Dios òf Mamon?
Les 3 di kuartaal 1, aña 2018
Lesa pa e siman aki:
Sal. 33:6-9; Mat. 19:16-22; 1 Ped. 1:18; Heb. 2:14, 15; Eks. 9:14; Sal. 50:10.
TEKSTO PRINSIPAL:
"P'esei tambe Dios a hals'E te na e halturanan, i a dun'E e nòmber ku ta riba tur nòmber, ku pa e nòmber di Hesus tur rudia mester dobla di esnan ku ta den shelu, i riba tera i bou di tera, i ku
tur lenga mester konfesá ku Hesu-Kristu ta Señor, pa e gloria di Dios Tata" (Filipensenan 2:9-11).
Dios òf Mamon?
sabbat, 13-01-2018
Dios no ta gasta palabra splikando Su perspektiva riba opseshon eksesivo di sèn i kosnan material. Kristu Su palabranan na e hòmber riku i kudishi kende ku maske el a ser bendishoná pa Señor, a akumulá i akumulá tur loke e tabatin, mester pone e temor di Dios den nos tur: "
'Bobo! Awenochi mes bo alma lo wòrdu eksigí for di bo; i awor ken lo bira doño di loke bo a prepará?' `Asina ta e hende ku ta montoná tesoro pa su mes, i no ta riku pa ku Dios" (Lukas 12:20, 21). Sirbi Dios i sirbi plaka ta akshonnan igualmente eksklusivo. Ta sea esun òf e otro, Dios òf mamon. E ta un fantasia pa pensa ku nos por tin e ambos banda pasobra pa biba un bida (libel tardi òf trempan lo destruí nos. Nos por gaña otronan, kisas asta nos mes, pero no Dios, na Kende nos tinku duna kuenta i rason un dia. Nos tinku hasi un eskoho, i mas nos bira- bira, formula eskusanan òf posponé e asuntu, mas fuerte e gara ku sèn i e amor pa sèn lo
Kristu, e Kreador
djadumingu, 14-01-2018
Lesa Genesis 1:1; Salmo 33:6-9; Isaias 45:11, 12; Jeremias 51:15 i Huan 1:3. Kiko e vèrsikulonan aki ta bisa nos tokante di e bondat di e mundu material?
"Ta Kristu tabata Esun ku a plama e shelunan i a pone e fundeshi di e tera. Ta Su man a brasa e mundunan den espasio i a forma e flornan di e kampo. 'Su forsa ta stablese e serunan."Laman ta di djE, pasobra ta E ta Esun ku a trah'é.' Sal. 65:6; Sal. 95:5. Ta E a yena e tera ku bunitesa i e airu ku kantika. I riba tur e kosnan den mundu, e airu i e shelu, El a skirbi e mensahe di e Tata Su amor."—Ellen G. White, The Desire of Ages, pg. 20. Kosnan material, riba nan mes, no ta malu. Kontrali na loke algun religion, ku ta siña hende ku e mundu i e kosnan material ta malu i ku solamente kosnan spiritual ta bon, Beibel ta balora e mundu material. Finalmente, Hesus mes a krea esaki. Kon anto e por ta malu? E por, desafortunadamente, meskos ku tur e donnan di Dios, wòrdu perverti usá pa maldat, pero esei no ta hasi e don original malu. Beibel ta spierta nos kontra abusu i pervershon di kosnan ku Dios a krea den e mundu aki, pero no kontra di e kosnan mes. Alkontrali, Dios a krea e mundu material, i E tabata ke pa Su pueblo por gosa di e fruta i benefisionan di e mundu aki tambe: "I abo, e levita i e stranhero ku ta biba meimei di bo lo regosihá den tur kos bon ku Señor bo Dios a duna abo i bo kas" (Deut. 26:11; wak Deut. 14:26 tambe).
Hesus ta e Kreador (Huan 1:1-3), i e tera ta un simpel muestra di loke El a krea. Su abilidat kreativo ta dun'E un perspektiva uniko riba bida mes esnan ku ta biba den dje. E sa e balor di kosnan material, i e sa ku El a duna nan na nos pa nos benefisio, i asta pa nos goso. E sa tambe, kiko ta pasa ora ku humanidat perverti e donnan ei, (òf ta asta hasi e donnan mas importante di loke nan ta, siendo, meskos ku tur kos, nan mester ser usá pa glorifiká Dios.
Wak rònt na e rekompensanan inkreibel di e mundu kreá. Asta despues di e dañonan di piká, ainda nos por mira e bondat basiko den asina tantu parti di dje. Kiko e mundu kreá, den su bondat, ta bisa nos tokante di e bondat di su Kreador?
Yu Hòmber di Dios/Yu Hòmber di Hende
djaluna, 15-01-2018
Komo Kristiannan, nos ta kere ku Hesus tabata kompletamente Dios i kompletamente humano. E union aki di Divinidat i humanidat ta hasi Su perspektiva uniko na loke ta importante riba tera i importante pa eternidat. E echo ku nos no por komprondé kon E por tin un naturalesa divino/humano no ta nulifiká e bèrdat aki, meskos ku un hende su falta di komprondementu tokante di aerodinamika no por hasi ku un avion ta keda sin bula. "Akinan tin dos misterio pa e prèis di unu-e pluralidat di personanan den e unidat di Dios, i e union di e Deidat i humanidat den e persona di Hesus.... Nada den fikshon ta asina fantastiko manera e bèrdat aki di enkarnashon."—J. I. Packer, Knowing God (Dowers Grove, Illinois: InterVarsity Press, 1973), pg. 53. Un motibu pakiko Hesus a bini na e mundu aki tabata pa mustra nos kon amoroso i kariñoso Dios ta i kuantu mas E ta kuida pa kada un di nos. Leu for di e deidat friu i distanshá, manera algun ta kere, Hesus a revelá e bèrdadero karakter di nos Tata selestial. Sinembargo, Satanas a purba na separá humanonan for di Dios. El a purba na stroba Dios, karakterisando E komo Un ku no ta preokupá pa nos. E ta hasi tur loke e por, pa medio di kualkier kos ku ta posibel, pa tene nos leu for di konosé i eksperenshá e realidat di Dios Su bondat i grasia. Un amor desordená di kosnan material ta funshoná bon komo un di Satanas su taktikanan pa alkansá e meta aki.
Lesa Mateo 19:16-22. Kiko e historia aki ta konta tokante di kon Satanas por usa nos amor pa kosnan material pa tene nos na distansha for di Senor?
Imaginabo Hesus mes, Dios den karni, papiando na e hòmber hoben aki kende opviamente tabata sa ku Hesus tabata un hende speshal. I tòg kiko a pasa? El a pèrmiti su gran rikesa, su amor pa kosnan material, separ'é for di Dios mes. E amor pa mundu i pa kosnan material a hasié asina siegu ku ounke e tabata tristu, e tristesa no tabata sufisiente pa lagu'é hasi loke ta korekto. E no tabata tristu pasobra e tabata perdiendo su pertenenshanan (esei no tabata e kaso). E tabata tristu pasobra e tabata perdiendo su alma pa e kosnan ei.
Sea nos ta riku òf pober, kon nos por ta sigur ku nos ta mantené e relashon korekto ku e kosnan di e mundu aki?
Kristu, e Redentor
djamars, 16-01-2018
Debe no ta un prinsipio di shelu. Pero Adam i Eva a peka, i un lei kibrá tabata nifiká morto.
Pues, humanidat a bira debedornan di hustisia divino. Nos a bai bakarota spiritualmente pa un debe ku nos no por a paga nunka bèk. Dios Su amor pa nos a pone e plan di redenshon den akshon. Hesus a bira un "garantia" pa nos (Heb. 7:22). Ta Kristu Su identidat komo; e Redentor ta revelá e transakshon di mas importante ku a yega di ser hasi. Solamente e sakrifisio di Su bida por a kumpli ku e pago rekerí di hustisia divino. Hesus a paga e debe di piká ku nos tabata debe komo hustisia i misèrikòrdia mará na e krus. E universo nunka promé a mira e despliege di asina tantu rikesa manera a ser usá den e pago di e redenshon di humanidat (Efe. 5:2). "Bashando henter e rikesa di shelu den e mundu aki, dunando nos henter shelu den Kristu, Dios a kumpra e boluntat, e afektonan, e mente, e alma di kada ser humano."—Ellen G. White, Christ's Object Lessons, pg. 326.
Lesa kada vèrsikulo i skirbi kiko Kristu a salba nos for di dje: Kol. 1:13; 1 Tes. 1:10; 1 Ped. 1:18; Heb. 2:14, 15; Gal. 3:13; Rev. 1:5.
E palabra griego tetelestai den Huan 19:30 a ser yamá e palabra di mas importante ku a ser papiá. E ta nifiká "ta kumplí," i e ta e ultimo palabranan ku Hesus a papia riba e krus. Su deklarashon final tabata nifiká ku Su mishon tabata kumpli i nos debe tabata "pagá kompleto."
E no a papia esaki komo un hende sin speransa pero komo un hende ku a logra e redenshon di e mundu pèrdi. Mirando na e krus di redenshon ta revelá e evento di pasado ku un efekto presente i un speransa di futuro. Hesus; a duna Su bida pa destrui piká, morto i e obranan di maldat di un bia i pa semper. Esaki ta nifiká ku maske ku nos no tabata meresé esaki, nos a ser redemí (Efe. 1:7). Pa vislumbrá e maravianan di salbashon ta igual na trapa riba tereno sagrado. Kristu komo e Redentor ta e imagen mas sublime di Dios. Su interes supremo ta pa redemi nos. Esaki ta revelá Su perspektiva pa ku humanidat i speshalmente kon E ta balora un relashon ku nos. Ku hustisia satisfasé; Kristu ta bira Su atenshon na nos kontesta pa ku Su sakrifisio.
Pensa tokante esaki: Kristu a paga e debe, totalmente i kompletamente, pa tur maldat ku bo a yega di hasi den pasado. Kiko bo kontesta na esaki, mester ta? (Wak Job 42:5, 6)
Un Dios Yalurs
djarason, 17-01-2018
Den Su konfrontashon ku Farao, Dios a deklará, "Pasobra e biaha aki lo Mi manda tur Mi plaganan riba bo, riba bo sirbidónan i riba bo pueblo, pa bo sa ku no tin ni un manera Ami den henter tera" (Eks. 9:14).
Kiko Señor tabata kemen ora ku El a bisa ku "no tin ni un manera Ami den henter tera"?
"Ta imposibel pa e mentenan finito di hende por komprondé e karakter òf e obranan di Esun Infinito kompletamente. Na mente di mas sabi, na mente di mas poderoso i ku mas edukashon, e Ser santu ei semper mester keda kubri den misterio."—Ellen G. White, Testimonies for the Church, vol. 5, pg. 698, 699.
No tin niun igual na Dios (1 Reinan 8:60). E ta pensa, kòrda i aktua na maneranan ku nos no ta komprondé. No importá kua intento nos purba pa hasiE den nos propio imagen, Dios ta keda Dios. E ta Esun ku a traha kada pida sneu, selebre, kara i karakteristika individual na un manera uniko, i "no tin ningun otro" (1 Reinan 8:60). Alfinal, E ta e Kreador, i komo Kreador siertamente e ta diferente for di Su kreashon.
Kiko e vèrsikulonan aki ta bisa nos tokante di kon diferente Dios ta for di Su kreashon?
1 Sam. 2:2; Sal. 86:8; Isa. 55:8, 9; Jer. 10:10; Tito 1:2.
Ora nos wak na tur loke Dios ta, tur loke E tin i tur loke E to hasi, e ta remarkabel ku E por tin kompetidornan. I esei ta asina tambe, pasobra den un sentido e tinku "kompeti" pa e amor i afekto humano. Kisas ta p'esei E ta bisa ku E ta un Dios "yalurs" (Eks. 34:14). Dios a krea sernan humano pa ta liber, kual ta nifiká nos tin e opshon pa sirbi E òf sirbi kualkier otro kos.
Esei, den hopi manera, tabata e problema esensial di ser humano: skohe pa sirbi otro diosnan, sin preokupá den ki forma nan ta bini, na lugá di sirbi e uniko Dios ku meresé sirbishi, Esun ku a krea i ta doño di e universo. P'esei realmente e ta un Dios yalurs.
Kiko den bo bida ta kompeti ku Dios pa bo afektonan?
Propiedat Bèrdadero
djaweps, 18-01-2018
Nos ta pertenesé na Dios, tantu pa medio di kreashon komo pa medio di redenshon. I no solamente nos ta pertenesé na Dios, pero tur nos pertenenshanan tambe Riba nos mes nos no ta doño di nada mas ku nos eskohonan so. Kontrali na esaki, un prinsipio sentral di mundanismo ta e pensamentu ku nos ta doño di nos pertenenshanan. Pero esaki ta un engaño. Pa Kristiannan pensa ku nan ta e doñonan prinsipal di nan pertenenshanan ta bai kontrali na loke e Palabra di Dios ta siña. Dios, no nos, ta doño di tur kos (Job 38:4-11). Nos ta simplemente stranhero i pasaheronan (Lev. 25:23), meskos ku e israelitanan tabata ora nan tabata den e Tera Priminti. Nos ta asta dependiente di Dios pa e siguiente biaha ku nos ta bai hala rosea (Ech. 17:25). Loke nos ta pensa ku ta di nos, realmente ta di djE. Nos ta simplemente Su saserdotenan, pues asina nos mester atendé ku pertenenshanan tangibel i asta intangibel pa e gloria di Dios.
Skirbi e kosnan for di e siguiente vèrsikulonan aki ku Dios ta doño di dje: Deut. 10:14;
Sal. 50:10; Sal. 104:16; Ezek. 18:4; Hag. 2:8; 1 Kor. 6:19, 20. Kiko e vèrsikulonan aki ta bisa nos tokante di kon nos mester mira kosnan material ku nos tin?
"Tur kos ta pertenesé na Dios. Hende por ignorá Su deklarashonnan. Mientras ku E ta pone Su bendishonnan grandemente riba nan, nan por usa Su donnan pa nan propio gratifikashon egoista; pero lo ser yamá pa duna kuenta i rason pa nan saserdosio"—Ellen G. White, Testimonies for the Church, vol. 9, pg. 246.
E propiedat di Dios i nos mayordomia ta rekerí un relashon, unu pa medio di kua E por usa nos na maneranan ku lo prepará nos pa shelu i ku lo benefisiá i bendishoná otronan. Pero saserdotenan infiel por restringui e akseso di e Doño na Su propio pertenenshanan. Manera nos a mira ayera, Dios no ta fòrsa Su boluntat riba nos. El a krea nos, i a duna nos pertenenshanan den e mundu aki pa manehá p'E te ora ku E regresá. Loke nos ta hasi ku nan ta reflehá e tipo di relashon ku nos tin kunÉ.
Pensa kiko ta nifiká pa, den realidat, bo no ta doño di niun di e kosnan ku bo tin pero ku nan ta pertenesé na Dios. Kiko esei mester bisabo tokante di kon bo mester relashoná ku e kosnan ku bo tin?
Pensamentu Mas Profundo:
djabierne, 19-01-2018
Saserdosio, manera nos ta komprondé esaki, a kuminsá ku Dios poniendo Adam i Eva den un hardin bunita komo nan kas, ku nan mester a kuida p'e i manehá (Gen. 2:15). Den e ambiente perfekto aki nan mester a hasi e hardin un lugá pa biba, un tarea ku lo no por tabata dje difisil ei. Dios a outorisá nan ròl nobo i a siña nan tokante di nan responsabilidat. Kuidando di Eden lo duna nifikashon i trese kontentura na e famia nobo. E verbo hebreo pa "goberná" (Gen.
1:26, 28) ta nifiká "pone bou di kòntròl òf guia." Mirando e konteksto, esaki no tabata un dominio difisil pero un regla na benefisio pa kuida Dios Su kreashon. E responsabilidat aki no a stòp. Den e ambiente aki Adam i Eva mester a siña ku Dios tabata e doño, i ku nan tabata Su mènedjernan òf saserdotenan. For di kuminsamentu tabata Dios Su plan pa Adam i Eva por tin pertenenshanan di responsabilidat i konfiansa pero no pa bira doño. Nan mester a demostrá Dios ku nan nan tabata fiel pa ku nan tarea.
"Adam i Eva a haña e hardin di Eden pa nan kuida p'e. Nan mester a dòrn'é i kuid'é." Nan tabata felis ku nan trabou. Mente, kurason i boluntat tabata funshoná den perfekto harmonia.
Den nan trabou nan no tabata sinti kansá ni ku nan tabata traha muchu duru. Nan oranan tabata yená ku trabounan util i komunion ku otro. Nan okupashon tabata plasentero. Dios i Kristu a bishita nan i a papia ku nan. Nan a haña e libertat perfekto. ...Dios tabata e doño di nan kas na Eden. Nan tabatin e danki na djE." Ellen G. White, Manuscript Releases, vol. 10, pg. 327.
Preguntanan di Diskushon:
1. E echo ku Dios ta doño di e mundu, kiko esaki ta siña nos tokante di nos responsabilidat básiko ora ta trata di e naturalesa? Mientras nos mester evitá e fanatismo polltiko di algun stimadó di medio ambiente ku praktikamente ta adorá naturalesa mes, kon nos aktitut komo Kristiannan mester ta ora ta trata di kuido di nos naturalesa?
2. Pensa un tiki mas riba e asuntu di ku Dios ta un Dios "yalurs". E no ta un konsepto fasil pa komprondé semper, speshalmente pasobra den tèrminonan humano nos ta mira yalusi komo algu malu, komo algu pa evitá. Kon e ora ei, nos por komprondé e asuntu aki manera e ta ser apliká na Dios sin ningun di e karga negativo ku e mundu ta karga usualmente?
3. Kon nos por siña distingui entre e uso i e goso apropiá di e kosnan fisiko ku Dios a krea i e abusu di e kosnan ei? Dikon ta asina importante pa hasi e distinshon aki?
