Profesia i Skritura
Les 10 di kuartaal 2, aña 2017
Lesa pa e siman aki:
Isa. 53:1-12; Dan. 7:13, 14; 2 Ped. 1:16-20; Mat. 17:1-6; 2 Tim. 3:15-17.
TEKSTO PRINSIPAL:
"I asina NOS tin e palabra profétiko pa mas siguransa, na kual boso ta hasi bon di pone atenshon, komo na un lampi ku ta lusa den un lugá skur, te ora dia habri i e strea di mardugá
sali den boso kurason." (2 Pedro 1:19).
sabbat, 27-05-2017
Mientras nos ta sigui studia e kartanan di Pedro, un punto mester resaltá: kuantu konfiansa Pedro tin i kon sigur e ta den loke e ta skirbiendo. Nos por mira mesun kos ku Pablo: konvikshon kla i firme tokante di loke nan ta proklamando pa loke ta trata Hesu-Kristu i e Krus. Den e versikulonan pa e siman aki, nos lo mira mas di e siguransa aki den Pedro. I asta e ta bisa nos dikon e tin asina tantu siguransa. Nos no ta kere, el a bisa, "fábulanan trahá ku astusia" (2 Ped. 1:16)—manera esnan ku ta komprometé religionnan pagano den nan tempu. Na lugá di esei, Pedro tabata sigur di loke e tabata kere aden, pa dos motibu.
Na promé lugá, e tabata un testigu di "nos Señor Hesu-Kristu" (2 Ped. 1:8). Pero na di dos lugá, i kisas aún mas importante (pasobra kasi tur otro hende lo no ta un testigu), ta e "palabra profétiko pa mas siguransa" (2 Ped. 1:19). Atrobe Pedro ta bai bek na e Beibel, mustrando na e Skrituranan pa e afirmashon sigur di Hesus, speshalmente e sekshonnan profétiko ku a papia tokante di djE. No tin duda ku esakinan ta algun di e mesun sekshonnan ku Hesus a
Hesus den e Téstamént Bieu
djadumingu, 28-05-2017
Den tur su epistolánan, Pedro ta skirbi ku un sentido di siguransa. E sa kiko e ta papiando di dje pasobra e sa Ken e ta papiando di dje. I un motibu ta ku e sa ku Hesus tabata Esun na ken e profetanan di Tèstamènt Bieu tabata mustra. Tabata Pedro su konfiansa den e Palabra skirbi kual a yud'e konosé e Palabra ku "a bira karni" (Huan 1:14).
Den 1 Pedro 1:10-12, Pedro ta mustra su lesadónan na e Beibel hebreo, na e profetanan di antes i loke nan a siña tokante di Hesus. Di akuérdo ku Pedro, e Spiritu Santu a revelá dos bèrdat krusial tokante di Hesus den e Tèstamènt Bieu: e sufrimentunan di Kristu i e glorianan ku lo a sigui (1 Ped. 1:11). E dos nan aki por ser hañá atraves di e Beibel hebreo.
Kiko e vèrsikulonan aki huntu ta siña tokante di loke e Tèstamènt Bieu a predesi tokante di Hesus? Sal. 22; Isa. 53:1-12; Zak. 12:10; 13:7; Jer. 233:14, 15; Dan. 7:13,14.
Den 1 Pedro 1:10-12, Pedro ta sigurá su lesadónan ku nan ta okupá un lugá hopi speshal den historia di salbashon. Hopi mas a ser revelá na nan ku a ser revelá na e profetanan di antes. E profetanan tabata papia na esnan den nan propio tempu, pero e partinan krusial di nan mensahenan lo no ser kumpli te na e binida di Kristu.
Algun kos ku e profetanan a predesi a bira realidat solamente den e tempu ku Pedro su lesadónan tabata biba. E lesadónan aki por a tende for di esnan "a prediká e evangelio na boso pa medio di Spiritu Santu, mandá for di shelu," bèrdatnan ku asta e angelnan tabata anhelá pa sa 1 Ped. 1:12, Beibel Santu). Ora ku e evangelio a ser prediká na nan, e pueblo tabata sa den mas detaye ku e profetanan di antes tokante e realidat i naturalesa di e sufrimentu i humiyashon di e Redentor. Klaro, nan lo mester warda, meskos ku nos, pa "e glorianan ku lo a sigui" (1 Ped. 1:11, Beibel Santu). Ku e promé parti di e profesianan ei kumpli, nos por ta sigur di e ultimo parti tambe.
Kua promesanan bibliko bo a mira kumpli den bo bida? Kua di nan bo ta wardando pe ainda, kiko nan ta nifiká pa bo i kon bo por siña pa tene duru na nan, sin importá kiko pasa?
Testigunan di Mahestat
djaluna, 29-05-2017
Lesa 2 Pedro 1:16-18. Kua otro evidensia Pedro ta bisa ku e tin pa su fe den Hesus?
Aparte di e palabra profétiko, Pedro tabata un testigu ku a mira hopi di e kosnan ku el a prediká di dje. Kristianismo, el a bisa, no ta fundá riba "fábulanan trahá ku astusia" (2 Ped. 1:16, Beibel Santu), pero riba eventonan real ku a sosodé den historia—eventonan ku e mes tabata testigu di dje.
Den e Evangelionan, Pedro tabata einan pa hopi di e susesonan krusial den e bida i ministerio di Hesus. E tabata einan na e predikamentu, e siñamentu i e milagernan. For di un dje promé milagernan di piská (Lukas 5:4-6) te na mira Hesus na Galilea despues di Su resurekshon (Huan 21:15), Pedro tabata un testigu ku a mira asina tantu di loke a sosodé.
Den 2 Pedro 1:17,18, kua evento Pedro a enfoká riba dje speshalmente pa loke ta trata loke ela mira personalmente? Kiko tabata e nifikashon speshal di e evento ei?
Pedro ta enfoká riba un evento spesifiko di testigu: e transfigurashon di Hesus. Hesus a bai ku Pedro, Santiago i Huan huntu kun'E riba e top di e seru pa hasi orashon (Lukas 9:28). Mientras E tabata einan ku nan, El a ser transformá dilanti di nan bista. Su kara a bria, i Su pañanan a bira blanku briyante (Mat. 17:2, Luk. 9:29). El a ser kompañá pa Moises i Elias, i un bos for di shelu a bisa, " 'Esaki ta Mi Yu stimá, den Kende Mi tin goso' " (Mat. 17:5, Beibel Santu).
Pedro a mira hopi den su tempu ku Hesus; tog e insidente aki ta resaltá. E ta revelá Hesus komo e Yu di Dios, ku Su tempu riba tera tabata ser pasá di akuérdo ku Dios Su plan i ku E tabatin un relashon hopi speshal ku e Tata. Asta ku tur loke Pedro a mira òf lo a mira, e evento aki—ku tabata inklui "e bos aki ku a bini for di shelu" (2 Ped. 1:18)—tabata esun ku el a enfoká riba dje den e karta aki.
Pensa tokante di kua evento òf eventonan a hasi impakto profundo i duradero riba bo bida spiritual i bo fe. Kiko e tabata, kon el a impaktá bo i kiko e ta nifka pa bo te ku awe? Dikon bo ta kere ku e tabatin e inpakto ku e tabatin? Komparti bo kontestanan den klas riba Sabat.
E Strea di Mardugá den Nos Kurason
djamars, 30-05-2017
"I asina nos tin e palabra profétiko pa mas siguransa, na kual boso ta hasi bon di pone atenshon, komo na un lampi ku ta lusa den un lugá skur, te ora dia habri i e strea di mardugá sali den boso kurason." (2 Ped. 1:19, Beibel Santu).
Lesa e vèrsikulo aki kuidadosamente. Kiko Pedro ta bisando ku ta asina importante pa nos, asta awe?
Akinan, manera nos por mira na hopi kaminda den Beibel (Gen. 1:4, Huan 1:5, Isa. 5:20, Efe. 5:8), un divishon ta ser hasi entre lus i skuridat. Pa Pedro, e Palabra di Dios a lusa manera un lus den un lugá "skur" (algun a tradusi e palabra skur komo "fis" i "sushi" tambe). Ta pesei e ta papia bon kla ku nos mester "pone atenshon" na e lus ei, pa sigui'e te ora "dia habri i e strea di mardugá sali den [nos] kurason." Nos ta sernan bibando den un mundu kai i skur. Nos tin mester di e poder sobrenatural di Dios pa guia i saka nos for di e skuridat aki hiba nos na e lus, i e lus ei ta Hesus.
Pedro ta mustrando su lesadónan na un meta. Algun ta kere ku e ekspreshon "te ora dia habri" ta referi na e segundo binida di Hesus. Ounke ku esei siguramente ta nos speransa prinsipal, e idea di e "strea di mardugá" saliendo den den boso kurason ta zona mas inmediato i mas personal. E "strea di mardugá" ta referi na Hesus (Rev. 2:28, 22:16). Su salimentu den nan kurason ta parse di ta tokante di konosé Hesus, tene na djE kompletamente i eksperenshando e realidat di e Kristu bibu den nan bida individual. Hesus no mester ta djis un bèrdat doktrinal; E mester ta e sentro di nos eksistensha i e fuente di nos speransa i fe. Pues, Pedro ta stablesiendo un konekshon bon kla entre studiamentu di e Palabra di Dios i tin un relashon, ku ta hiba na salbashon, ku Hesus, e "strea di mainta."
I, naturalmente, ku e lus lusando den nos, nos lo plam'e na otronan. "Henter e mundu mester ser iluminá ku e gloria di e bèrdat di Dios. E lus mester lusa na tur e paisnan i tur e pueblonan. I ta for di esnan ku a risibi e lus e mester sigui lusa. E strea di mainta a sali riba nos, i nos mester lusa su lus riba e kaminda di esnan den skuridat."—Ellen G. White, Christian Experience and Teachings of Ellen G. White, pg. 220.
E Palabra Profétike pa Mas Siguransa
djarason, 31-05-2017
Lesa. 2 Pedro 1:19-21. Na kua profesíanan Pedro ta referiendo? Kiko e kiermen ora ku e bisa ku ningun profesía di Skritura no ta un asuntu di interpretashon personal?
Enfatisando ku Kristianismo no ta basá riba fábulanan trahá ku astusia (2 Ped. 1:16), Pedro bini ku dos liña di evidensia dilanti: na promé lugá, testigunan ku a mira (2 Ped. 1:16-18); na di dos lugá, e profesianan di Skritura (2 Ped. 1:19-21), un argumento ku el a usa mas promé (1 Ped. 1:10-12).
Pedro ta bisa tambe ku, "ningun profesia di Skritura no ta un asuntu di interpretashon personal" (2 Ped. 1:20, Beibel Santu). Bisando esaki, Pedro no ta prohibiendo nos pa studia Skritura pa nos mes. Esei lo ta hopi leu for di e pensamentunan di esun ku a bisa, den 1 Pedro 1:13, pa "faha e hepnan di boso mente" (Beibel Santu) òf "sea prepará i huisioso" (BPK). Ni tampoko lo a ser bisá pa unu ku a elogiá e profetanan di antes pa nan buskeda diligente pa sa e nifikashon di e profesianan ku a ser duná na nan (1 Ped. 1:10).
Pues kiko Pedro tabata kiermen? E iglesia di Tèstamènt Nobo a progresá huntu i a studia huntu. Kristiannan tabata parti di un kurpa mas grandi (1 Kor. 12:12-14). I akinan Pedro tabata atvertiendo tokante e tipo di estudio den kua hende ta ninga kualkier informashon for di e komunidat di kreyentenan. Interkambiando ku otronan nos por krese huntu komo un komunidat. E Spiritu ta traha ku e komunidat i e individuonan den dje. Informashonnan por ser komparti, rafiná i profundisá. Pero esun ku ta traha su so, ningando yudansa di otronan, ló por yega na interpretashonnan robes, speshalmente ku algu manera profesia.
Den e siguiente vèrsikulonan nos ta haña un bon motibu pa Pedro hasi e opservashon aki. E ta skirbiendo na Kristiannan ku tin profetanan falsu i siñadónan falsu entre nan
(2 Ped. 2:1). Pedro ta bisando nan pa someté nan interpretashonnan di Skritura na e dirigentenan di e iglesia densu totalidat. Kuantu hende a hala bai den fanatismo i eror pasobra nan a ninga di tende na e konseho di e komunidat di kreyentenan ku ta ser guiá pa e Spiritu? E tabata un peliger den pasado, i ainda e ta un peliger awe.
Dikon ta asina importante pa ta habri pa e konseho di iglesia den so totalidat? Tambe, kiko ta e limitenan i kon leu nos mester yega na someté na otronan?
E Palabra den Nos Bida
djaweps, 01-06-2017
Manera nos a mira, Pedro a pone gran enfasis riba e Skritura Santu. Di dos Pedro 1:19-21 ta un afirmashon poderoso di e importansha di e Beibel na nos eksperensha Kristian i na e inspirashon divino di e Skrituranan. Su punto ta kla den 2 Pedro 1:21. E Beibel no ta e produkto di boluntat humano ni idea human manera otro bukinan. E ta un buki produsi pa medio di e poder di e Spiritu Santu trahando atraves di "hòmbernan santu di Dios."
Lesa 2 Timoteo 3: 15-17. Kon e vèrsikulonan aki ta yuda nos komprondé e rol di e Skritura den nos bida? Kon nan laga e bèrdat di 2 Pedro 1a19-21 kumpli?
Despues di a atverti Timoteo tokante di e peligernan ku ta biniendo riba dje i e iglesia, Pablo ta duna un resumen chikitu di e importansha di Skritura. "Tur Skritura ta inspirá pa Dios i ta util pa siñansa, pa reprendementu, pa korekshon, pa eduká den hustisia" (2 Tim. 3:16).
Laga nos wak na e tres puntonan aki.
Dòktrina: Dòktrinanan ta e siñansanan di e iglesia. Nan ta ekspresá e kreénsianan di e komunidat riba varios topikonan bibliko ku ta ser konsiderá komo importante den e Palabra di Dios. Idealmente, kada dòktrina mester ta Kristo-séntriko, i kada unu mester siña nos algu ku ta yuda nos pa sa kon pa biba di akuérdo ku e "perfekto boluntat di Dios" (Rom. 12:2, Beibel Santu).
Guiansa: Pablo ta bisa Timoteo ku Skritura ta util pa "reprendementu, pa korekshon, pa eduká den hustisia" (2 tim. 3:16). Pedro ta trese un punto similar dilanti ora el a bisa ku e profesia den Skritura ta manera un lampi ku ta lusando den un lugá skur (2 Ped. 1:19). Den otro palabra, Skritura ta proveé guiansa den e manera ku nos mester biba i den kiko ta un kondukta korekto i robes. inspirá pa e Spiritu Santu, Skritura no ta nada menos ku e boluntat revelá di Dios.
"Sabiduria ku ta hiba na salbashon": Ora ku e ta bisa ku Skritura ta duna nos "sabiduria ku ta hiba na salbashon" (2 Tim. 3:15), Pablo ta mustrando ku Skritura ta mustra nos na Hesus. Salbashon ta trahá riba e kreénsia ku Hesus a muri pa nos pikánan.
Pensamentu Mas Profundo
djabierne, 02-06-2017
"Ta e promé i mas haltu deber di kada ser rashonal pa siña for di e Skrituranan loke ta bèrdat, i despues pa kana den e lus i enkurashá otronan pa sigui su ehèmpel. Kada dia nos mester studia e Beibel diligentemente, pesando kada pensamentu i komparando skritura ku skritura. Ku yudansa divino nos mester forma nos opinionnan pa nos mes mientras nos mester duna kuenta i rason di nos mes dilanti di Dios.
"E bèrdatnan mas kla revelá den e Beibel a ser lorá den duda i skuridat pa hòmbernan studiá, kende, ku e preteksto di gran sabiduria, ta siña ku e Skrituranan tin un nifikashon spiritual skondi, sekreto ku no ta bisto den e idioma usá. E hòmbernan aki ta siñadónan falsu. Ta na e klase di hende asinaki Hesus a deklará: `boso no ta komprendé e Skrituranan ni e poder di Dios.' Marko 12:24. E lenguage di e Beibel mester ser splika di akuérdo ku su nifikashon bisto, amenos ku un simbolo òf figura ta ser duná. Kristu a duna e promesa: `Si un hende her hasi Su boluntat, e lo sa di e siñansa.' Huan 7:17. Si hende djis wak e Beibel manera e ta skirbi, si no tabatin siñadónan falsu pa desviá i konfundi nan mente, un trabou lo ser kumpli ku lo hasi angelnan kontentu i ku lo trese den e tòu di Kristu miles i miles ku awor aki ta dwaldu den eror."—Ellen G. White, The Great Controversy, pg. 598, 599.
Preguntanan Pa Diskushon:
1. Kua otro prinsipionan krusial ta involvi den buskamentu pa yega na un bon komprondementu di Skritura?
2. Martin Luther a skirbi ku "Skritura ta su propio lus." Ku esei e tabata kiermen ku tin un unidat den Beibel i ku un parti por ser usá pa yuda nos komprondé e otro partinan. Kua ta algun ehèmpelnan di e prinsipio aki ku bo por haña?
3. Den klas, pasa riba bo kontesta na e pregunta di djaluna tokante di e evento òf eventonan ku a impaktá bo eksperensha Kristian grandemente. Kiko e eventonan tin en komun, si nan tin similaridat? Kiko bo por siña for di e eksperenshanan di un otro?
4. Si un hende mester puntra bo kon studiamentu di e Beibel por profundisá bo kanamentu ku Señor, kiko lo bo kontestá? Kua prinsipionan bo a siña for di bo propio eksperensha di buska pa konosé Señor Hesus pa medio di estudio di Su Palabra Skirbi?