Un Stap Den Fe
Les 13 di kuartaal 3, aña 2020
Lesa pa e siman aki:
Filipensenan 2:5-11; Mateo 4:18-20; Echonan 9:3-6, 10-20; Huan 21:15-19; 1 Huan 3:16-18.
TEKSTO PRINSIPAL:
"Boso mester tin e mesun aktitut ku Kristu-Hesus tabatin: Ounke E tabata meskos ku Dios, E no ker a para riba su derecho di keda igual na Dios. No, El a pone esei un banda; El a bira
meskos ku un katibu, i a bira igual na hende" (Filipensenan 2:5-7).
Un Stap Den Fe
sabbat, 19-09-2020
Hesus a bini na e mundu aki di sufrimentu i morto pa revelá e Tata Su karakter di amor, pa gana bèk e afekto di rasa humano, i pa redemí henter humanidat. " Nunka por realisá e kosto di nos redenshon, te ora ku e redemínan ta pará huntu ku e Redentor dilanti e trono di Dios. E ora ei ora ku e glorianan di e hogar eterno penetrá den nos sentidonan enkantá, nos lo kòrda ku Hesus a laga tur esaki patras, pa nos motibu, ku no solamente El a bira un eksiliá for di kortenan di shelu, pero pa nos motibu El a tuma e rísiko di sufrí frakaso i pèrde tur kos eternamente. E ora ei, di nos mes, nos ta kohe nos korona i pone abou dilanti Su pianan i elevá e kantika, ' E Lamchi ku a keda matá ta digno di risibí e poder rikesa sabiduria i forsa, honor, gloria i alabansa.' Revelashon 5:12:·- Ellen G. White, The Desire of Ages, p. 131.E sakrifisio ku Hesus a hasi pa nos salbashon ta inkalkulabel. Ora nos respondé na Su yamada, aseptá Su mandato, i uni kunE den traha pa alkansá esnan pèrdí pa Su reino, esaki ta rekerí sakrifisio. Ounke nunka por kompará nos sakrifisionan ku esun di djE, ministerio di gana almanan ta un stap grandi den fe pa nos, tambe. E ta saka nos for di nos zona di komodidat pa stap drenta awanan deskonosí. Tin biaha, nos Señor ta yama nos pa hasi sakrifisionan, pero e gosonan ku E ta ofresé ta hopi mas grandi
Hesus Su Amor Di Sakrifisio-Propio
djadumingu, 20-09-2020
Apòstel Pablo ta enkurashá nos pa "laga" òf "permití" e mente di Kristu biba den nos. Esaki ta hiba nos na algun preguntanan fasinante. Kon e mente di Kristu tabata? Kiko tabata goberná patronchi di Su pensamentunan? Kua tabata esensia di Su pensamentu?
Lesa Filipensenan 2:5-11. Kon e versíkulonan aki ta revelá e kurason di Kristu Su pensamentu i e patronchi ku tabata goberná henter Su bida?
For di tur eternidat Hesus tabata igual ku Dios e Tata. Pablo ta deklará e bèrdat eterno aki den e palabranan aki, "Ounke E tabata meskos ku Dios, E no ker a para riba Su derecho di keda igual na Dios" (Filipensenan 2:6). E palabra tradusí pa "forma" ta e palabra Griego morphê. E ta nifiká esensia mes di un kos. E ta konektá dos kos ku ta di mesun balor. E SDA Bible Commentary ta splik'é asina: "Esaki ta hasi Hesus igual ku e Tata, i ta ponE hopi mas ariba di kualke otro poder. Pablo ta enfatisá esaki pa presentá den forma mas bibu e profundidat di Kristu Su humiashon boluntario."-Buki 7, p. 154. Papiando di Su naturalesa eterno, Ellen G. White ta añadí, "Den Kristu tin bida, original, no-fiá, sin desendensia."-The Desire of Ages, p. 530. Hesus ku tabata un ku e Tata for di tur eternidat, "El a pone esei un banda" (Filipensenan 2:7). Esaki tambe ta un ekspreshon fasinante Griego. Literalmente por tradusi'é "hasi bashí." Hesus boluntariamente a "hasi Su Mes bashí" di tur Su privilegionan i derechonan komo Dios Su igual pa tuma e forma di un hende i bira un sirbidó humilde di humanidat. Komo sirbidó, El a revelá shelu su lei di amor na henter e universo i, finalmente, hasi e akto último di amor na e krus. El a duna Su bida pa salba esun di nos, eternamente. E esensia di Hesus Su pensamentu tabata amor ku ta sakrifiká-su-mes. Pa sigui Hesus kiermen ku nos ta stima manera E a stima, nos ta sirbi manera E a sirbi, i nos ta ministrá manera E a ministrá. Permití Hesus dor di Su Spiritu Santu libra nos for di ambishon egoista, lo kosta nos algu. El a kosta Hesus tur kos. Pero Skritura ta bisa di Hesus, "P'esei Dios a als'E na e lugá di mas haltu i a dun'E e nòmber ku ta riba tur otro nòmber" (Filipensenan 2:9). Shelu lo ta balelapena kualke sakrifisio ku nos hasi akinan riba tera. Lo tin sakrifisionan tur e karninda, pero e gosonan di servisio lo ta muchu mas ku nan, awe, i e goso eterno di por biba ku Kristu dor di tur eternidat, lo hasi kualke sakrifisio ku nos hasi akinan, parse insignifikante.
Kua tabata e último biaha ku abo realmente mester a muri pa bo mes pa Kristu Su kousa? Kiko bo kontesta ta bisa bo di bo bida kristian?
Yamada Di Kompromiso
djaluna, 21-09-2020
lmaginá ku abo ta Pedro i Huan. Solo a kaba di sali riba un bunita mainta na Galilea, koriendo ku e friu di airu di anochi. Bo pensamentunan ta riba un kos: bai piska, kohe hopi piská. Piskamentu tabata bon resientemente, i bo ta wak padilanti pa un otro día di bon piskamentu. Despues den lus tempran di mainta bo ta mir'E aserkando, ta Hesus di Názaret. Sin ku bo mes sa, denter di algun ratu henter bo bida lo kambia. Nunka lo bo ta mesun hende.
Lesa Mateo 4:18-20. Pakiko bo ta kere ku Pedro i Huan tabata dispuesto pa hasi un kompromiso asina ekstremo pa sigui Kristu? Kiko den e teksto ta indiká ku Kristu tabata yama nan na un propósito mucho mas halto ku kohe piská?
For di e Evangelio di Huan nos ta haña sa ku e hòmbeman aki ya tabata sabi algu kaba di Hesus, pa mas ku un aña, sinembargo nan no a komprometé nan mes kompletamente n' E. Tòg, mester tabatin algu den e aktitut di Hesus, algu ku Su aparensia, palabranan, i akshonnan ku tabata indiká na e piskadónan aki di Galilea, ku E tabata yama nan na un yamada divino. E rason pakiko nan a bai laga nan botonan, nan okupashon, i nan medio ambiente familiar pa siguiE, ta pasobra nan a sinti e yamada na un propósito mas haltu. E piskadónan komun aki a rekonosé ku a yama nan pa un propósito ekstraordinario. Di mes un forma, Dios kisas no ta yamando abo pa laga bo profeshon awe, pero E ta yama bo na un propósito ekstraordinario: pa kompartí Su amor i pa testifiká di Su bèrdat, kaminda bo ta, pa e gloria di Su nòmber.
Konsiderá e yamada di Mateo, e kobradó di belasting, den Mateo 9:9. Kiko bo ta mira den e pasashi aki ku ta hopi remarkable.
Kobradónan di belasting den mundu Romano tabata hopi biaha opresor, ku tabata usa nan poder ofisial pa oprimí e hendenan komun. Nan tabata e tipo di hendenan mas odiá i despresiá den henter Israel. Kristu Su invitashon, "Sigui Mi,"ta laga di komprondé ku Mateo a tende di Hesus i den su kurason e tabatin un anhelo pa sigui E. Ora e invitashon a yega, e tabata kla. E tabata asombrá ku Hesus lo asept'é, i asta invit'é pa ta un di Su disipelnan. Profundo den nos kada un su kurason tin un anhelo pa algu mas den bida. Nos, tambe, ke biba pa algu balelapena, pa un propósito mas haltu, mas nobel. Asina, Kristu ta yama nos, meskos ku Mateo, pa nos siguiE.
Pensa riba kiko hende mester a laga atras pa nan sigui Hesus. Pakiko, na final, esaki lo ta semper balelapena?
Pablo: Dios Su Pòchi Skohí
djamars, 22-09-2020
Ora Pablo a aseptá Kristu, henter su bida a kambia kompletamente. Kristu a dun'é un futuro kompletamente nobo. El a sak'é for di su zona di komodidat pa hañ'é ku eksperensianan ku hamas e por a kere tabata posibel. Ken e? Dor di guia di Spiritu Santu, apòstel Pablo a proklamá e Palabra di Dios na míles di hende dor di henter e mundu Mediteráneo. Su testimonio a kambia historia di Kristianismo i di mundu.
LESA Echonan 9:3-6, 10-20. Kon e versíkulonan aki ta revelá ku Hesus tabatin un propósito divino pa Pablo su bida?
Hesus hopi biaha ta skohe e kandidatonan di mas improbabel pa karga testimonio na Su nòmber. Pensa riba e hòmbernan endemoniá, e muhé Samaritano, un muhé prostituta, un kobradó di belasting, piskadónan di Galilea, i awor un hòmber ku ta persiguí Kristiannan ferosmente. Tur esakinan a keda kambiá dor di grasia, i despues nan a sali bai ku goso den nan kurason pa konta kiko Hesus a hasi den nan bida. Kada un di nan nunka tabata kansa di konta e historia. Loke Kristu a hasi pa nan tabata asina maravioso, ku nan mester a komparti'é. Nan no por a keda ketu.
Kompará Echonan 28:28-31 i 2 Timoteo 4:5-8. Ki indikashon bo tin den e versíkulonan aki, ku Pablo nunka a basilá, ni arepentí for di su kompromiso di duna henter su bida na Kristu den un ministerio pa gana almanan?
Na final di su bida, miéntras e tabata bou di aresto domisiliario na Roma, Pablo a afirmá ku "Sa anto ku Dios a manda e mensahe di salbashon aki pa esnan no hudiu. Nan sí lo skucha!" (Echonan 28:28). E registro ta bisa ku "Tur hende tabata bon biní serka dje. E tabata prediká reino di Dios" na nan (Echonan 28:30, 31). Na final di su bida, e ta urgí Timoteo pa hasi e trabou di un evangelista, i di su mes Pablo por a bisa, "Mi a lucha e bon lucha, mi a kore e kareda te na fin i mi a mantené mi fe" (2 Timoteo 4:7). Ounke nos yamada kisas no ta mes dramátiko ku esun di Pablo, Dios ta yamando kada un di nos pa partisipá huntu kunE den Su trabou di kambia e mundu. Ta opvio ku apesar di tur e difikultatnan ku el a pasa dor di dje den transkurso di e añanan (mira 2 Korintionan 11:25-30), Pablo a keda fiel na su yamada den Señor. E historia kon e hòmber aki ku ántes tabata persiguí e siguidónan di Hesus, a para bira e hende di mas influensia di e fe Kristian, ku eksepshon di Hesus, ta keda un testimonio poderoso te awe, di loke Señor por hasi dor di un hende, ku dediká su bida na e trabou di Señor.
E Demandanan di Amor
djarason, 23-09-2020
Amor semper ta manifestá su mes den akshon. Nos amor pa Kristu ta pusha nos hasi algu pa humanidat ku ta perdí. Pablo a ekspresá esaki kla ora ku el a bisa na iglesia na Korinto, "Pasobra e amor di Kristu ta forsá mi" (2 Korintionan 5:14,). Kristianismo no ta na promé lugá, pa bandoná kosnan malu pa nos por ta salbá. Hesus no a "bandoná" kosnan malu den shelu, pa E por ta salbá. El a bandoná kosnan bon pa asina otronan por ta salbá. Hesus no ta invitá nos pa simplemente duna nos tempu, talento i tesoronan pa Su kousa; E ta invitá nos pa duna nos bida. Den un enkuentro e mainta ei ku e disipelnan kantu di laman di Galilea, Hesus a resumí e demandanan di amor divino.
Lesa Huan 21:15-19. Ki pregunta Hesus a hasi Pedro tres biaha, i kua tabata Pedro su kontesta? Pakiko Hesus a hasi Pedro e pregunta partikular aki tres biaba?
Pedro a nenga su Señor tres biaha, i Hesus a saka afó un respuesta di amor for di Pedro su mes lepnan, tres biaha. Den presensia di e disipelnan, Hesus tabata rekuperando Pedro su konfiansa, ku amor divino a pordoná su falta, i ku te ainda Hesus tabatin trabou pa e hasi den Su kousa.
Lesa Huan 21:15-19 atrobe, pero e biaha aki paga tino na Hesus Su kontesta na Pedro su afirmashon di su amor pa Kristu. Kiko Hesus a bis'é hasi despues?
Amor divino ta aktivo, no pasivo. Amor genuino ta mas ku un sintimentu kaluroso, e ta mas ku un idea bunita. E ta envolví kompromiso. Amor ta fòrsa nos aktua. E ta motivá nos rèk man yuda un mundu pèrdí di Dios Su yunan ku ta desesperadamente den nesesidat. Ora Hesus a bisa Pedro, "Duna Mi lamchinan di kome," esaki tabata tantu un mandato i tambe un restorashon di konfiansa konfortabel. E Maestro a pidi un reakshon na amor, i El a enkurashá Pedro tambe ku te ainda E tabatin un trabou pa e hasi, apesar di Pedro su komportashon bergonsoso ora Hesus a wòrdu arestá. Pedro no solamente a nenga ku e tabata konosé Hesus, eksaktamente manera Hesus a bisa ku e lo bai hasi, pero el a hasi esei tambe ku maldishon. E punto? Abo kisas por a faya bo Señor desesperadamente. Bo por a neng'E dor di bo akshonnan, mas ku un biaha. E bon notisia ta ku te ainda tin grasia, i Dios Su trabou ku bo i den bo no a kaba ainda. Te ainda tin un lugá den Su kampo pa abo, si bo ta dispuesto.
Abo a yega di "nenga" Señor manera Pedro? Si ta asina, kiko e historia, no djis di Pedro su nengamentu so, pero tambe di Kristu Su palabranan na Pedro, ta bisa na abo?
Amor Su Kompromiso
djaweps, 24-09-2020
Na final di e kombersashon entre Pedro i Hesus, nos ta mira dos hende ta kana kant'i playa. Segun e olanan ta bai bini, Hesus a konta Pedro di e kosto di ser un disipe!. E ke pa Pedro sa kla kiko e lo bai enfrentá si e aseptá Hesus Su invitashon pa "Duna Mi karnénan di kome."
Lesa Huan 21:18, 19. Kiko Hesus a bisa Pedro di e kosto di disipulado? Pakiko bo ta kere ku Hesus a revelá algu asina spantoso na Pedro na e punto aki den su bida?
Den e palabranan ei, Kristu a laga Pedro sa ku un dia e lo muri komo martir. Su mannan lo wòrdu di rèk riba un krus. Den e revelashon aki, Kristu a ofresé Pedro un chens pa e skohe. El a ofresé e goso di mas grandi ku tin den bida: pa mira almanan ganá pa e reino di Dios. Riba dia di Pentekóste e lo mira míles bini serka Kristu. E lo hasi milagernan den Hesus Su nòmber, e lo glorifik'E dilanti hopi míles mas. E lo tin e goso eterno di ta kompañero ku Kristu den Su mishon. Pero e privilegio ei lo bini ku un preis. E lo demandá un sakrifisio, e sakrifisio final. A pidi Pedro hasi e kompromiso ku su wowonan hanchu habrí, pasobra Pedro tabata sabi awor, ku ningun sakrifisio tabata muchu grandi, pa uni ku Hesus den Su mishon na e mundu.
Lesa 1 Huan 3:16-18. Pa Huan, amor ta mas ku un simpel palabra. Kon Huan ta definí amor su sakrifisio fundamental?
Den eternidat, nada ku nos a yega di hasi lo parse un sakrifisio. Nos invershon di tempu i esfuerso, i di nos bida lo ta rekompensá sobreabundante. Sinembargo, ki un goso ta pa troka amor den akshon, pa troka intenshon den dedikashon. Ora nos respondé na amor divino dor di tene nada atras, segun nos ta rèk man yuda sirbi pa testifiká na otronan komo embahadornan di Kristu, nos ta kumpli e propósito di nos bida i ta eksperensiá bida su goso di mas grandi. Hesus a pone asina: "Awor ku boso sa e kosnan aki, boso lo ta felis si boso hasi nan tambe" (Huan 13:17). Bida su goso di mas grandi i su felisidat duradero ta bini ora ku nos ta kumpliendo ku meta di nos eksistensia dor di glorifiká Dios, den e forma ku nos ta biba, anto kompartí Su amor i bèrdat ku e mundu.
Ta duru pa kapta e idea di eternidat, ora ku tur loke nos konosé ta djis un pida chikí di tempu. Trata di imaginá bida eterna mas mihó ku bo por, bida bon pa eternidat-mas mihó ku kualke kos ku nos tin akinan-i asina, pakiko nada akinan, den e pida tempu kortiku aki, lo ta balelapena pèrde e promesa di bida eterno ku nos tin den Hesus.
Mas Estudio:
djabierne, 25-09-2020
"Esnan ku tin e supervishon spiritual di iglesia mester ideá formanan i medionan pa duna oportunidat na kada miembro di iglesia pa aktua algun parti den Dios Su trabou. Demasiado biaha den pasado no a hasi esaki. Nos a traha plannan kla i kumpli nan kabalmente, kaminda por usa e talentonan di tur den servisio aktivo. Ta poko tin ku a ripará kuantu a pèrde dor di esaki. E lidernan den Dios Su kousa, meskos ku generalnan sabí, mester traha plannan pa avansá den tur direkshon. Den nan planiamentu mester pone atenshon espesialmente na e trabou ku laikonan por hasi pa nan amistatnan i bisiñanan. Dios Su trabou riba e tera aki lo no kaba nunka, te ora ku hòmbeman i muhénan, ku ta parti di nos feligresía di iglesia, komprometé nan mes den trabou i uni nan esfuersonan ku esnan di ministernan i ofishalnan di iglesia. "Salbashon di pekadornan ta rekerí trabou personal i sinsero. Nos mester hiba pa nan e palabra di bida, no warda pa nan bini serka nos. Oh, mara mi por a papia palabranan na hòmber i muhénan pa spierta nan pa tuma akshon diligente! E momentunan konsedé na nos ta tiki. Nos ta para na frontera mes di e mundu eterno. Nos no tin tempu di pèrde. Kada momentu ta oro i demasiado presioso pa dediká simplemente na sirbi nos mes. Ken lo buska Dios di kurason sinsero i risibí for di djE forsa i grasia pa ta Su trahadónan fiel den e kampo mishonero? "Tin talento den kada iglesia, i konektá ku e tipo di trabou korekto, e por keda desaroyá pa bira un gran ayudo den e trabou aki. Loke tin mester awor pa edifikashon di nos iglesianan ta e bunita trabou di obreronan sabí pa diserní i desaroyá talento den iglesia-talento ku por wòrdu eduká pa e Maestro Su uso."- Ellen G. White, Testimonies for the Church, buki 9, p. 116, 117.
Preguntanan pa Diskushon:
1. Kua ta e pensamentu prinsipal di Ellen G. White su sita aki riba? Ki impakto e por tin riba bo
testifikashon personal i bo iglesia su obra mishonero?
2. Kon amor genuino ta manifestá su mes semper? Kua ta algun formanan falsifiká di amor, ku
tin tiki di hasi ku amor genuino?
3. Den klas, papia di e sakrifisionan ku hende a hasi pa Señor, inkluyendo pèrdè nan bida.
Kiko bo por siña for di e historianan aki?
4. Pensa di bo kontesta riba e pregunta na final di lès di djadumingu, tokante kiko abo a
sakrifiká pa Kristu. Kiko, en realidat, bo a sakrifiká? Pakiko bo a hasi esei? E tabata balelapena? Kon bo por splika na un hende ku no ta kristian loke bo a hasi i pakiko bo a hasi'é?
