E Obra di Spiritu Santu
Les 12 di kuartaal 1, aña 2017
Lesa pa e siman aki:
Huan 16:8-11; Rom. 5: 10; Heb. 4: 15, 16; 1 P. 5:8, 9; 1 Huan 5: 12, 13; Salmo 31:24.
TEKSTO PRINSIPAL:
"Ku awor e Dios di speransa yena boso tur ku goso i pas den kerementu, ku boso por abundá den speransa dor di e poder di Spiritu Santu" (Rom. 15: 13, NASB).
sabbat, 18-03-2017
Manera nos a yega na fin di nos estudio pa e kuartal aki ku a bai over di e Spiritu Santu i over di spiritualidat, nos lo enfoká riba un otro obra desisivo di e Spiritu ku ainda no a risibí nos atenshon.
Ora ku Hesus a anunsiá na Su disipelnan ku E ta bai serka Su Tata, E a primintí di manda e Spiritu Santu pa nan. "'Pero e Ayudante, e Spiritu Santu, Kende e Tata lo manda den Mi nomber, E lo siña boso tur kos, i lo trese na boso memoria tur kos ku Mi a bisa boso"'(Huan 14:26, NKJV).
Di akuerdo ku Hesus, e Spiritu Santu ta un parakletos, ku ta nifiká un "Yudadó", of "Konsolador", of un "Abogado" ku ta intersedé pa nos. Na e mesun momentu Hesus ta anunsiá tambe e obra ku e Abogado aki lo hasi: E mundu E lo "kombensé" di piká, i di hustisia, i di huisio (Huan 16:8, NKJV).
Durante di nos siman final aki nos lo studia ku mas detaye e obra spesífiko aki di Spiritu Santu. Nos lo haña sa tambe kon e obra aki di e Spiritu ta relashoná na dos otro aspekto importante di Su ministerio pa nos: nos siguransa di salbashon i e speransa glorioso ku ta impulsá nos bida komo disipelnan di Kristu.
Konvikshon di Piká
djadumingu, 19-03-2017
Lesa Huan 16: 8, 9. Kua ta e obra krusial ku Spiritu Santu ta hasi pa nos, i dikon esaki ta asina importante?
Hesus a yama Spiritu Santu e paraclete, un palabra ku ta riku na nifikashon, i unu ku ta duna e idea di ayudante, abogado, i konsolador. Spiritu Santu no ta drenta den e importante obra di konvikshon aki komo akusadó di e rumannan, of komo nos prokurador. E ta mandá dor di Hesus, no pa kondená nos, pero mas bien pa yuda mira nos nesesidat di grasia.
Solamente un konsolador lo keda risibí komo ayudante. Ta un tragedia grandi ku kristiannan, ounke ku nan tin bon intenshon, ta aserká pekadornan hopi biaha ku un spiritu akusadó, enbes di un spiritu yudadó. Si nos ta kana pasa rónt mustrando piká den bida di otro hende, e ora ei nos ta hasiendo algu ku Hesus no a yama nos pa hasi. Pues, ta ken nos ta pa saka na klaridat piká ku ta den otronan, ora ku nos mes apénas ta sin piká.
Lesa Rom. 2:1 i Mt. 7:3. Kua ta e mensahe ku nos mester saka for di e versíkulonan aki?
Nos ta Su testigunan, no Su akusadónan. Nos ta yamá pa ta testigu di Su poder redentor, no pa kondená otronan pa nan fayonan. Pa trata kondená otronan di nan pikánan nos ta asumí un obra ku no ta pertenesé na nos; esaki ta obra di Spiritu Santu.
Ta e Konsolador-no nos-ku mester "kombensé" (Huan 16:8, RSV) e mundu di loke piká realmente ta. Hende ku no a dediká nan bida na Hesus, hopi biaha no tin un sentido real di kiko piká berdaderamente ta, i djis kon destruktivo e por ta.
E idea akinan no ta ku e Spiritu lo traha lista di spesífiko hechonan robes. Na lugá di esei, E ta bai na e piká mas fundamental di tur: falta di kerementu den HesuKristu (Huan 16:9). Nos desgrasia di mas grandi no ta konsistí den nos imperfekshon moral, sino den nos kreamentu di distansia for di Dios, i nos rechaso pa aseptá Esun ku Dios a manda ku e propósito pa reskatá nos for di e kondishon aki.
E problema fundamental di tur piká ta ku nos no ta kere den Hesus i, asina ei, ta rechasá Esun ku por salba nos for di nos piká i nos kulpabilidat. Esaki ta e piká ku ta pone e ami den e sentro di kosnan i ta nenga di kere e Palabra di Dios. Ta solamente Spiritu Santu por habri nos kurason i nos mente na nos gran nesesidat pa repentimentu i di e Redenshon ku ta hañá pa medio di Kristu Su morto na nos fabor.
Nesesidat i Hustisia
djaluna, 20-03-2017
Huan 16:8 a bisa ku Spiritu Santu lo kombensé e mundu, no djis di piká so, pero tambe di hustisia. Den otro palabra, e mundu, ku no sa kiko piká realmente ta, tampoko sa kiko hustisia berdadero ta. Hendenan ku no ta kombertí ta imaginá ku moralidat eksterno ta sufisiente. Nan ta deseá, no e hustisia di Dios, sino nan propio hustisia. Nan ta deseá un hustisia ku ta bini for di nan hechonan eksterno, tal manera obedensia na e lei di Dios. Pero nos hechonan di obedensia na e lei hamás por hustifiká nos dilanti di Dios.
Den Isa. 64:6 e profeta ta deskribí tur hecho di hustisia, kreá dor di hende mes durante di su tempu, komo "paña masha fis." Hasta nos mihó hustisia, ku ta religiosamente motivá i konsiderá asina dor di nos mes, ta den realidat nét kontrali: inhustisia.
Pero e hustisia di Hesus ta sufisiente pa nos. E ta kumpli ku tur e eksigensianan di e lei di Dios. E ta konta ku Dios e Tata. I nos por pidié pa nos mes pa medio di fe den HesuKristu so.
Lesa Rom. 5:10 i Heb. 4:15, 16. Kon nos hustisia ta relatá na Kristu Su ministerio bibu den presensia di e Tata na shelu?
E hustisia ku lei ta demandá ta kumplí dor di Hesus Su bida perfekto. E a muri na nos fabor. Ounke rechasá dor di esnan ku a mat'É aki na tera, E a risibí bonbiní serka e Tata na shelu. Pa medio di e resurekshon Dios Tata a pone e stémpel di aprobashon riba Hesus Su bida i riba Su obra redentor. Awor Hesus ta biba pa intersedé pa nos (Heb. 4:15, 16), i E ta apliká e méritonan di Su morto na nos fabor, pasobra nos no tin e hustisia ku ta nesesario pa salbashon.
Asina anto, nos por biba pasobra E ta biba den nos. "Mi a wórdu krusifiká ku Kristu, i ya no ta ami ta biba mas, pero Kristu ta biba den mi; i e bida ku mi ta biba awor den karni mi ta biba pa fe den e Yu di Dios, ku a stima mi i a duna Su mes pa mi" (Gal. 2:20, NKJV). Ora Hesus ta biba den nos, nos ta kana pa medio di e Spiritu (Rom. 8:4) i ta risibí bida spiritual nabo atraves di e poder di Spiritu (kompará ku Gal. 3:2-5; 5:16, 18).
Eksaltamentu di Hesus den shelu dor di e Tata ta revelá den Kristu Su presensia poderoso meimei di nos pa medio di e Spiritu. Yená ku poder dor di Spiritu Santu, Su disipelnan ta biba den konformidat kresiente pa ku Kristu.
Bo a yega di eksperensiá e realidat di djis kon sushi bo propio intentonan pa hustisia realmente ta? Kiko esaki ta siña bo over di bo nesesidat di e hustisia di Kristu na lugá di esei?
Konvikshon Enkuanto di Huisio
djamars, 21-03-2017
Lesa Huan 16:8, 11. Na ki huisio Hesus ta refiriendo? Dikon e huisio aki ta bon notisia?
Ta sobra un último gran konvikshon, ku ta parti di e obra di e Spiritu: e konvikshon relashoná ku huisio. Akinan ta kaminda hopi di nos predikamentu riba e pasashi aki ta parse di ta bai den direkshon robes i destruktivo. Hopi biaha un diskushon over di piká i huisio ta parse di guia hopi kristian praktikante pa pronunsiá un spiértamentu over di e huisio kontra di esnan ku ta rechasá Kristu. Hasiendo esaki nan ke spiérta pekadornan, hopi biaha ku énfasis pa kousa miedu, di e huisio futuro ku ta spera nan.
I ounke ku e huisio ei ta un realidat, esaki no ta e loke ku Kristu ta bisa den Huan 16:11. E lenguahe ta indiká ku Señor no ta papiando over di e futuro huisio, manera ku E a hasi den Huan 12:48. Enbes di esei, e aspekto di e huisio na kua Hesus ta referí akinan ta e bon nobo ku Satanas ya kaba a keda huzgá na Kalvario. E diabel, e gran enemigu di e bérdat, ta bibando awor riba tempu fiá. Huisio lo bini, pero e enfoke akinan ta riba un entendimentu ku e prens di e mundu aki ya ta kondená kaba aworakí.
Lesa 1 P. 5:8, 9. Kon Pedro ta deskribí Satanas? Kon nos por resistié?
Diabel, sabiendo ku su tempu ta kórtiku, i ku e a keda fatalmente derotá na Kalvario, sinembargo ainda ta na bida. I e ta furioso, e ta purba destruí mas tantu hende ku e por. Pero e ta un enemigu derotá. Hesus a gana e viktoria. E sanger di Hesus ta hasi nos liber.
Ora ku, durante di Segundo Guera Mundial, e trupanan Nazi a risibí e gólpi
desisivo pa motibu di e invashon eksitoso di Fransia dor di e aliadonan riba 6 yüni 1944, tabata bisto ku Hitler a keda derotá. Tóg, e diesun luna ku a sigui entre D-Day (ora ku e atake a kuminsá) i VE-Day 1 (8 mei 1945, ora ku guera na Europa a terminá) tabata esun di mas sangriento ku tur. Di e mesun manera, Satanas sa ku e a keda desididamente derotá na e krus. Tóg, e ta sigui bringa insistentemente i ta purba destruí mas tantu hende ku e por. Den e tempunan desafiante aki nos ta keda yamá pa ta sobrio i alerta, i pa tira tur nos ansiedat riba Hesus, pasobra E ta kuida pa nos (1 P. 5:7, 8).
Dikon huisio ta bon notisia? Ken ta nos seguridat den e huisio? Kon nos por prediká over di e huisio di tal manera ku asina nos por genera mas bien speransa enbes di miedu?
E Seguridat di Salbashon
djarason, 22-03-2017
Lesa 1 Huan 5:12, 13; Rom. 8:15-17; i 2 Kor. 5:5. Asina ku nos aseptá Kristu komo nos Salbador, dikon nos por tin e seguridat di bida eterno? Kua ta e base pa e seguransa aki?
Spiritu Santu ta Esun ku ta guia pekadornan na Hesus. Hesus Su morto sustituto a rekonsiliá nos ku Dios. Hesus, ku ta pordoná, ta hasi nos líber pa biba un bida nobo komo yunan adoptá dor di Dios. Ya nos no ta mas enemigu di Dios (Rom. 5:10), pero nos ta kana di akuerdo ku e Spiritu (Rom. 8:4), i tin nos pensamentunan fihá riba e kosnan di e Spiritu (Rom. 8:5). Si nos no tabatin e Spiritu di Kristu, nos lo no tabata Su yunan i lo no a pertenesé na djE (Rom. 8:9). Pero awor nos tin e testimonio interno di Spiritu Santu ku ta biba den nos. E ta testifiká ku nos ta pertenesé na Hesus i ku nos ta heredero di Dios i ko-heredero ku Kristu (Rom. 8:17). E mesun bida poderoso ku a lanta Hesus for di morto, ta aktivo awor den nos i ta hasi nos ku tabata spiritualmente morto, bibu (Rom. 8:10). Hasta mas ku esei, E ta seya alabes den nos kurason e siguransa ku berdaderamente nos ta pertenesé na Dios. Dor di a tende i a kere e evangelio di nos salbashon, nos ta seyá den Hesus ku Spiritu Santu, Kende ta duná komo un garantia di nos herensia (Efe. 1:13, 14, NASB). Kada kreyente por tin e seguridat aki (1 Huan 5:12, 13).
Lesa Efe. 1:13, 14. Kiko ta nifiká pa ta seyá dor di e Spiritu?
Esnan ku aseptá Kristu ta nase di nobo; esei ke men, nase "'di e Spiritu'" (Huan 3:3, 5). Spiritu Santu ta seya e hecho aki den nos kurason ku asina nos por tin e siguransa di ta salbá, i por eksperensiá e goso ku ta bini for di e hecho di ta un yu di Dios. Spiritu Santu ta identifiká nos komo pertenesiendo na Kristu. "Si e hendenan no tin e, Spiritu di Kristu, nan no ta pertenesé na Kristu" (Rom. 8:9, NIV). Awor nos tin e noshon ku Dios ta nos Tata amoroso i ku nos ta Su yunan stimá. Spiritu Santu ta e "down payment 2", e deposito, óf e promesa pa ku e don final di bida eterno i inmortalidat ku lo keda duná na nos ora ku Hesus regresá pa segundo biaha (1 Kor. 15:51-54). Esaki ta e seyo di garantia di fe outéntiko. Ta difísil pa sa kon kristiannan por duna testimonio ku poder konvinsente si nan no tin tal siguransa.
Papia ku kurashi, papia ku fe i speransa, i lo bo ta lus total den Señor. Sigui meditá riba e porta habrí ku Hesus a pone bo dilanti, i ku ningun hende no por sera. Dios lo sera e porta kontra di tur maldat si bo dun'É un oportunidat. Ora ku e enemigu drenta manera un inundashon, e Spiritu di Señor lo lanta pa bo un stándart kontra di dje."- Ellen G. White, The Advent Review and Sabath Herald, April 16, 1889.
Spiritu Santu i Speransa
djaweps, 23-03-2017
Lesa Rom. 5:4, 5; 15:13; i 1 Kor. 13:13. Kon amor i speransa ta relashoná ku otro? Kon Spiritu Santu ta instrumental den duna nos amor i speransa?
Spiritu Santu ta Esun ku a drama e amor di Dios denter di nos kurason. E ta konektá nos ku Dios i ta hasi Dios Su amor biba den nos. Dios Su amor firme i inkambiabel ta e motibu i e baranka di nos speransa. Sin amor lo no por tin speransa. Ta solamente amor ta generá speransa. Pasobra Dios Su amor ta kombiná ku Su fieldat, nos tin e speransa maravioso ku E lo bin bék i bai kas ku nos kaminda ku E ta.
Lesa Salmo 31:24. Kua ta e efekto ku speransa tin riba nos?
Speransa ta inspirá. Speransa ta duna forsa nobo. Speransa ta laga nos kanta i tin goso. Speransa ta esensial pa bida. Si no tin speransa, ta kua lo ta e propósito di bida?
Sinembargo, pa tin speransa ta algu diferente for di ta optimista. Esun optimista ta pensa ku tur kos lo drecha: e tempu, ekonomia, e puntonan na skol, finansa, ets. Speransa, sinembargo, no ta optimismo siegu. Mas bien, e ta basá riba e fieldat di Dios i riba e promesanan ku E a duna den pasado. Speransa ta kere ku Dios lo kumpli ku loke ku E a bisa pasobra E ta fiel i berdadero. Dios a proba ku por dependé riba djE, i E no ta basilá. Su firmesa i Su bérdat ta e fundeshi pa nos speransa
No ta di puntra mes: e fundeshi di nos speransa ta hañá den Hesus na e krus. Ora ku nos kontemplá e krus, nos por wak e realidat di Dios Su amor pa nos na e manera mas poderoso ku ta posibel. E krus ku Hesus muriendo pa nos pikánan, ta duna na nos i na e universo un revelashon sin presedente di netamente kiko nos Dios ta den realidat.
Asina anto, komo sernan kaí i temporal den un kósmos sin límite, nos por haña speransa, no den nos mes óf den kualke kos "grandi" ku nos ta logra, sino den nos Dios un Dios ku na e krus a revelá Su mes na nos.
Di ki manera e speransa di e Advent ta fundamentá den e promesanan fiel di Dios? Di ki manera speransa ta influensiá nos bida? Kon nos por desaroyá un estilo di bida ku ta reflehá speransa enbes di desesperashon?
Mas Estudio
djabierne, 24-03-2017
Lesa partinan for di Ye Shall Receive Power, Ellen G. White, spesialmente e sekshon di óktober: "Ready for the Spirit," p. 283-313.
Nos por resumí e aktividat di Spiritu Santu dor di bisa ku Spiritu Santu ta obra den harmonia huntu ku Dios Tata i Dios Yu pa realisá nos salbashon. Spiritu Santu ta lanta nos for di morto spiritual. E ta guia nos na un konosementu di nos pekaminosidat i ta habri nos bista na e hecho ku, den nos mes i di nos mes, nos ta perdí. E ta lanta den nos e deseo pa logra kambio i ta guia nos na HesuKristu, Kende ta e úniko Un ku por supli e nesesidatnan di mas profundo di nos ser. E ta duna nos seguridat di salbashon pasobra semper e ta mustra nos na Hesus i na loke Hesus a hasi pa nos. E ta hasi kambio den nos pa asina nos por ta mas tantu manera Hesus. E ta mantené nos fiel den nos kanamentu ku Dios. E ta kapasitá nos pa por kumpli ku Dios Su boluntat i pa, di forma efektivo, partisipá den obra mishonero. E ta hasi di e Palabra Skirbí di Dios nos guia i norma sigur pa nos bida i doktrina kristian. Ta na unda nos lo tabata sin Spiritu Santu? Ta kiko nos lo por a hasi sin Spiritu Santu? Nos lo tabata miserabel i perdí i lo no por a hasi nada ku lo a duna gloria i honor na Dios. Danki na Hesus pa a primintí i a manda Spiritu Santu. "Di tur e donnan ku E por a pidi Su Tata pa eksaltamentu di Su pueblo, e Spiritu Santu tabata esun di mas haltu.."-Ellen G. White, Ye Shall Receive Power, p. 13.
Preguntanan pa Diskushon:
1. Tuma mas tempu pa meditá riba e preguntanan di kiko piká ta i di kiko hustisia ta. Dikon nos, komo kristiannan ku ta kere den e Beibel komo e Palabra di Dios, tin un komprondementu diferente di kiko piká i hustisia ta ku esnan ku no ta kere den e Beibel? Kua ta e diferensianan ei? Kiko Beibel ta siña nos over di hustisia ku otro fuentenan no ta siña?
2. Kompartí ku e miembronan di bo klas di Sabat Skol kua aspekto di e obra di Spiritu Santu tabata di mas balor pa bo. Dikon e tabata asina importante, i kon esaki a impaktá bo bida?
3. Papia den klas over di e speransa ku nos tin den Hesus. Kua ta e motibunan pa e speransa aki? Ke men, si un hende mester puntra bo over di e "rason pa e speransa ku ta den bo" (1 P. 3:15, NKJV), kiko lobo kontestá, i dikon? Ki argumentu konvinsente lo por bo duna?
4. Les di e siman aki ta papia over di e pregunta relashoná ku siguransa di salbashon. Kiko ta siguransa di salbashon? I si nos tiné, kua ta e motibu ku nos tiné? Riba kiko e mester ta basá? I kon e ta diferensiá for di presunsion?
