Kòrsou komo isla i pais outónomo den Karibe, semper a konosé retonan finansiero ekonómiko ku tin nan rais den eskohonan ku a tuma lugá desenianan promé ku outonomia: refinería siendo ku nos mes no tin reserva petrolero, kompañá ku importashon di forsa laboral durante dos terser parti di siglo binti, énfasis riba importashon di alimento enbes di produkshon lokal, ousensia di vishon riba medio ambiente i naturalesa ku ta hasiendo nos vulnerabel pa konsekuenshanan di kambio di klima i adaptashon di sistemanan fiskal ku no ta tene kuenta ku limitashonnan di un poblashon relativamente chikí.
E aserkamentu pa ku inovashon den nos sistema pa finansiá i invertí den desaroyo a korto plaso i desaroyo duradero di nos pais, tin sinku komponente:
1. Simplifiká i modernisá nos sistema fiskal;
2. Diversifiká ekonomia i promové eksportashon;
3. Modernisá e sistema presupuestario i invertí dirigí riba nesesidatnan mas grandi
4. Digitalisá i oumentá servisio na komunidat 5. Fleksibilisá merkado di kapital
Sistema fiskal simpel i moderno
Ta imperativo pa bòltu e sistema ku gobièrnu ta krea fondo pa por kumpli ku su programa di desaroyo pa i den komunidat. P’esei PIN lo simplifiká e sistema di impuesto di forma aselerá, saliendo for di e siguiente puntonan di salida:
1. Efisiente, transparente i práktiko: Ménos tipo di impuesto i un sistema transparente ku ta stimulá produktividat di e empresa;
2. Hustu: Paga según e tamaño e di empresa i entradanan kalkulá;
3. Sigur: Tarifa i forma di pago di impuesto fiho;
4. Bai pa ‘belasting’ indirekto i ménos ‘belasting’ direkto.
5. Revisá e leinan i stòp e sistema di pone tur responsabilidat riba e pagadó di belasting, hasta ora e inspektor faya;
6. Stòp e ‘gebruikelijk loon’ ku ta asumí un salaris pa e direktor i kobra belasting real for di ganashi.
Ekonomia diversifiká
Den eskoho di industrianan nobo, PIN ta duna preferensha na invershonnan sostenibel.
P’esei e eskoho ta konsiente pa:
• Invertí hopi den produkshon lokal di kuminda i prosesamentu di produktonan alimentisio (spar divisa)
• Den turismo di “wellness”, kaminda ta konserva nos naturalesa i medio ambiente,
• Den Kanabis Medisinal
• Den industria kreativo i
• Den servisionan ku uzo di teknologia (SMART)
• ´E-gaming’
Tur e aktividatnan aki ta bai kompañá pa un maneho agresivo dirigí riba eksportashon ku ta kontribuí na generá divisa. PIN ta mira hopi oportunidat pa empresa chikí i mediano i hopi kupo di trabou duradero ku na su turno ta generá mas sirkulashon di sen den komunidat, ku ta pasa di trahadó pa empresa i di empresa pa gobièrnu i bèk na komunidat.
Presupuesto efektivo
Lo revisá e sistema presupuestario pa sigurá ku e entradanan di gobièrnu ta bai kaminda mas mester: Enseñansa i formashon i sostén direkto pa pa esnan ku no tin entrada. Ehèmpel di e aserkamentu aki ta introdukshon di un sistema nobo di ayudo sosial i sistema penitensiario nobo kaminda ta hinka ménos sèn den sera hende tras di trali i mas den hasi hende produsí pa alsa su motivashon i mehorá su funshonamentu den komunidat. Den ambos kaso gobièrnu ta empleá hende ku e ta sostené sosialmente i resosialisá, ku e mésun florin.
Kuadro di Inovashon 2021-2030
35
Gobièrnu digitalisá
Digitalisashon di tur proseso pa atendé ku pèrmitnan komersial i privá/individual, tambe lo kontribuí na solushonnan multiplé.
P’esei PIN ta modèrnisá i outomatisá e manera pa pidi, paga pa i renobá pèrmit ku un sistema integral di gobièrnu elektróniko (e-government). Basikamente lo eleminá tur inefisiensia di servisio dor di outomatisá prosesonan pa hasi petishon, pidi informashon i uso di servisionan di gobièrnu mas tantu posibel.
E aserkamentu aki ta parti integral di un proseso pa evaluá kua servisio gobièrnu mester ofresé na kua kalidat i adaptá e struktura di e aparato públiko. Outomatisashon di e prosesonan pa pèrmit lo keda kompañá ku mehorashon di sistemanan di kobransa i un maneho di but pa eskivashon di pago.
Kapital flèksibel
Despues ku a sanea debe, institutonan finansiero tin muchu mas likides. E likides primordialmente ta di depositantenan (persona òf entidat hurídiko). Nan ta konfia ku e instituto finansiero tin e fondonan ei disponibel ora nan mester di nan. Ademas Banko Sentral ta pone un kantidat di kondishon pa garantisá bienestar di e depositante.
Esei ta nifiká ku no tin mag di spera ku e banko di su mes ta kore mas riesgo ku finansiamentu di invershon. Ku otro palabra mester stimulá e depositante pa e mes pone mas di su fondonan disponibel komo kapital di riesgo pa invershonnan viabel. Sin mas kapital di riesgo, vários proyekto lo keda posponé of kanselá, siendo ku invershon aselerá ta un kondishon kardinal pa fleksibilisashon di labor por surti efekto riba
direkshon di nos ekonomia.
Banda di adaptashon di nos leinan laboral, mester pensa riba otro instrumentonan di maneho pa stimulá uso di mas tantu likides komo kapital di riesgo. Akinan ta rekomendabel pa alabes stimulá kombinashon di kapital pa asina posibilitá finansiamentu di proyektonan katalisadó tan nesesario.
Mester garantisá un intenshon serio di invershon di parti di doñonan di kapital, sino redefinishon di derechi laboral no tin sentido i riba dje lo bira praktikamente imposibel pa konvensé e gremio laboral pa aseptá kualke adaptashon den e lei di protekshon di trabou. Komo un instrumento pa aktivá likides komo kapital di riesgo, konkretamente PIN ta sugerí pa parsialmente transforma deber fiskal den obligashon pa invertí. E punto di salida ta ku sektor privá ta esun mihó ekipá pa hasi invershon produktivo.
Ideologikamente PIN ta pone e aksento riba e esfuersonan di sektor privá ora ta trata di ekonomia. E idea ta pa na lugá ku e empresario paga impuesto, e keda pushá pa usa mas di su likides pa invershon produktivo.
Den e proposishon algun konsepto ta sentral:
a) Winstbelasting (impuesto riba ganashi kondishonal): ta hisa e tarifa di impuesto riba ganashi, pero empresanan ta haña eksonerashon di parti di e impuesto, plus un redukshon di e obligashon segun tarifa aktual, bou di e kondishon ku, den di un tempu kòrtiku despues di e aña fiskal, nan ta depone e eksonerashon i redukshon den un fondo sertifiká di invershon. Pa stimulá inveshon ta bai pa determiná tur montante kaminda e invershonista ta dedusí e montante for di impuesto di ganashi.
b) Investeringsaftrek: pa stimulá invershon ta bai determiná un montante kaminda e invershonista por dedusí e montante di su invershon for di impuesto riba ganashi.
c) Kapital flèksibel
Nos a konstatá ku institutonan finansiero no ta finansiá proyektonan debí na difer-ente motibu. Pa stimulá invershon nos ta proponé:
1. Introdusí investeringsaftrek ,mará na invershon den e aña despues di e aña fiskal ku e obligashon a nase.
2. Krea un fondo spesial pa invershon di riesgo. E persona of instituto por dedusí un parti di e invershon for di belasting.
Kuadro di Inovashon 2021-2030Kuadro di Inovashon 2021-2030
37 37
Tambe PIN a sòru pa nos grandinan ku ta dotá ku eksperiensha di bida no ser poné pafó di arena polítiko. Falta di eksperiensha tabata bisto den funshonamentu di nos sistema demokrátiko último añanan. E kombinashon di ekperiensha i dinamismo di esnan ku ménos eksperiensha pero dotá ku hopi talento, ta nesesario pa nos progresá ku aplikashon di ideanan inovativo.