E Aliansa Nobo
Les 10 di kuartaal 2, aña 2021
Lesa pa e siman aki:
Jer. 31:31-34; Mat. 5:17-28; Hos. 2:18-20; Isa. 56:6, 7; Heb. 8:7, 8; Heb. 10:4; Mat. 27:51.
TEKSTO PRINSIPAL:
"'Ata, e dianan ta bin," SEÑOR ta deklará, "ku lo Mi sera un aliansa nobo ku e kas di Israel i ku e kas di Juda" (Jeremias 31:31).
E Aliansa Nobo
sabbat, 29-05-2021
Un karikatura den un revista hopi añanan pasá a mustra un manager di negoshi den un kantor pará dilanti un grupo di otro managernan. E tabata tene un kaha di detergente den su mannan, mustrando esaki na otronan. Ku orguyo el a mustra na e palabra Nobo ku tabatin skirbí ku leternan kòrá grandi riba e kaha, indikando ku e produkto tabata nobo. E manager a bisa na e momentu ei, "ta e 'Nobo' riba e kaha ta nobo". Den otro palabra, tur loke a kambia, tur loke tabata nobo, tabata simplemente e palabra Nobo riba e kaha. Tur sobrá kos tabata meskos.
Den un sentido, un hende por bisa ku e aliansa nobo ta meskos ku esaki. E base di e aliansa, e speransa ku e tin pa nos, e kondishonnan básiko di dje, ta meskos ku ta wòrdu hañá den e aliansa bieu. E tabata semper un aliansa di Dios Su grasia i miserikòrdia, un aliansa basá riba amor ku ta surpasá debilidatnan i derotanan humano.
Un bista di e siman: Ki similaridat ta eksistí entre e aliansa bieu i e nobo? Ki ròl e lei ta hunga den e aliansa? Ku ken e aliansanan a wòrdu será? Kiko e buki di Hebreonan ta referí komo un "mihó aliansa"? (Heb. 8:6).Ki relashon tin entre e aliansa i e santuario selestial?
Ata, E Dianan ta Bin...
djadumingu, 30-05-2021
Lesa Jeremías 31:31-34 i kontestá e siguiente preguntanan:
1. Ken ta inisiá e aliansa?
2. Di ken su lei ta wòrdu papiá akinan? Ki lei esaki ta?
3. Ki versíkulonan ta enfatisá e aspekto relashonal ku Dios ku Su pueblo?
4. Ki akto di Dios na fabor di Su pueblo ta forma e base di e relashon di e aliansa ei?
Ta masha kla: E aliansa nobo no ta algu hopi diferente for di e aliansa bieu será ku Israel na Seru Sinaí. De paso, e problema ku e aliansa di Sinaí no tabata ku e tabata bieu i for di moda. Na lugá di esei, e problema tabata ku el a wòrdu kibrá (mira Jer. 31:32).
E kontestanan na e preguntanan ariba menshoná, tur ku ta wòrdu hañá den e kuater versíkulonan ei, ta prueba ku hopi fasetanan di e "aliansa bieu" ta permanesé den esun nobo. E "aliansa nobo" ta, den un sentido, un "aliansa renobá."Ta e kulminashon i kumplimentu, di e promé.
Enfoká riba e lastu partí di Jeremías 31:34, kaminda Señor ta bisa ku E lo pordoná nan inikidat i e piká di Su pueblo. Maske ku Señor ta bisa ku E lo skirbi e lei riba nos kurasonnan i poné den nos, tòg E ta enfatisá ku E lo pordoná nos piká i inikidat, ku ta violá e leí skirbí den nos kurason. Bo ta mira kualke kontradikshon òf tenshon entre e dos ideanan aki? Si ta no, dikon no? Kiko e ta nifiká, manera Romanonan 2:15 ta poné, pa por tin e lei skibí den nos kurasonnan? (Mat. 5:17-28).
Mirando na e versíkulonan pa awe, kon bo por usa nan pa kontestá e argumento ku di un manera òf otro e Dies Mandamentunan (òf spesífikamente, e Sabat) no ta konta mas bou di e aliansa nobo? Tin kualke kos den e teksto ku ta bisa asina? Si tin algu, kon un hende por usa e tekstonan ei pa prueba e eternidat di e lei?
Obra di Kurason
djaluna, 31-05-2021
Na e tempu ora ku e reino di sür di Juda tabata serka di yega na un fin i e pueblo wòrdu hibá den koutiverio na Babilonia, Dios a anunsiá a traves di Su profeta Jeremias e "aliansa nobo." Esaki ta e promé biaha ku e idea aki ta wòrdu ekspresá den Beibel. Sinembargo, ora e 10 tribunan di e reino di nort di Israel tabata bai wòrdu destruí (algun 150 añanan promé ku e tempu di Jeremias), e idea di un otro aliansa a wòrdu menshoná un biaha mas, e biaha aki pa medio di Hosea (Hos. 2:18-20).
Lesa Hosea 2:18-20. Nota e paralelo entre loke Señor ta bisa einan na Su pueblo ku loke E ta bisa den Jeremias 31:31-34. Ki imágen komun ta wòrdu usá, i un biaha mas, kiko e ta bisa tokante e nifikashon i naturalesa básiko di e aliansa?
Na momentunan den historia ora Dios Su plan pa Su pueblo skohí tabata wòrdu strobá dor di nan rebeldia i nan falta di konfiansa, E ta manda profetanan pa proklamá ku e historia di e aliansa ku Su fielnan no a yega na un fin. No importá kon infiel e pueblo por tabata, no importá e apostasia, rebeldia, i desobedensia meimei di nan, ainda Señor ta proklamá Su disponibilidat pa drenta den un aliansa di relashon ku tur ku ta dispuesto pa repenti, pa obedesé, i reklamá Su promesanan.
Buska e siguiente tekstonan. Aunke nan no ta menshoná spesífikamente un aliansa nobo, ki elementonan ta wòrdu hañá den nan ku ta reflehá e prinsipionan tras di e aliansa nobo?
Ezek. 11:19 Ezek. 18:31
Ezek. 36:26
Señor lo proveé'' 'un kurason pa konoséMi, pasobra Ami ta SEÑOR'" (Jer. 24:7). E lo"saka e kurason di piedra for di nan karni i duna nan un kurason di karni' "(Ezek. 11:19), i lo duna nan" 'un kurason nobo' "i" 'un spiritu nobo' "(Ezek. 36:26). Tambe El a bisa, " 'Lo Mi pone Mi Spiritu den boso' "(Ezek. 36:27). E trabou aki di Dios ta e fundeshi di e aliansa nobo.
Si un hende bini serka bo i bisa, "Mi ke un kurason nobo, mi ke e lei skirbí riba mi kurason, mi ke un kurason pa konosé Señor-pero mi no sa kon pa haña esaki," kiko lo bo bisa e persona aki.
Aliansa Bieu i Nobo
djamars, 01-06-2021
" 'Tambe e stranheronan ku uni nan mes ku SEÑOR, pa sirbiÉ, i pa stima e nòmber di SEÑOR, pa ta Su sirbidónan, kada un ku no ta profaná dia di sabat, i ta tene firme na Mi aliansa, eseinan lo Mi hiba na Mi seru santu, i lo Mi hasi nan kontentu den Mi kas di orashon. Nan ofrendanan kimá i nan sakrifisionan lo ta aseptabel riba Mi altar, pasobra Mi kas lo wòrdu yamá kas di orashon pa tur e pueblonan' "(Isa. 56:6, 7).
Jeremías ta bisa ku e aliansa nobo mester wòrdu hasí ku" 'e kas di Israel" (Jer. 31:33). Esaki ta nifiká ku ta únikamente e desendientenan literal di Abraham, Hudiu dor di nasementu i sanger, mester risibí e promesanan di e aliansa?
No! De paso, esei no tabata ni bèrdat den tempu di Tèstamènt Bieu. Ku e nashon Hebreo, den su totalidat, a wòrdu duná e promesanan di e aliansa, ta prosupuesto korekto. Sinembargo, e no a wòrdu hasí ekskluyendo otro nan. Al kontrario, tur, Hudiu i Gentil, a wòrdu invitá pa partisipá den e promesanan, pero nan mester a bai di akuerdo pa drenta den e aliansa ei. E no ta diferente awe.
Lesa e teksto ariba menshoná den Isaias. Ki kondishonnan nan ta pone riba esnan ku ke sirbi Señor? Tin realmente algun diferensia den loke Dios ta pidi nan i loke E ta pidi nos awe? Splika bo kontesta?
Apesar ku e aliansa na bo ta wòrdu yamá "mihó" (wak e estudio di djárason), realmente no tin diferensia den e elementonan básiko ku ta forma tantu e aliansa bieu i na bo. Ta e mesun Dios, ku ta ofresé salbashon na e mesun manera, pa medio di grasia (Eksodo 34:6, Rom. 3:24); ta e mesun Dios ku ta buska un pueblo ku pa medio di fe lo reklamá Su promesanan di pordon (Jer. 31:34, Heb.8:12); ta e mesun Dios ku ta buska pa skirbi e lei den e kurasonnan di esnan ku ke sigui E den un relashon di fe (Jer. 31:33, Heb. 8:10), Hudiu òf Gentíl.
Den e Tèstamènt Nobo, e Hudiunan, respondiendo na e elekshon di grasia, a risibí Hesus i Su evangelio. Pa un tempu nan tabata e kurason di e iglesia, e "remanente, skohí pa medio di grasia" (Rom. 11:5) den kontraste di esnan ku a wòrdu "enduresé" (Rom. 11:7). Na mesun momentu, e Gentílnan, ku previamente no tabata kere, a aseptá e evangelio i a wòrdu di enter den Dios SU pueblo berdadero, formá pa kreyentenan, no importá na kua pueblo òf rasa nan ta pertenesé na dje (Rom. 11:13-24). Pues e Gentilnan ku pa un tempu tabata separá di Kristu, ekskluí for di e siudadania di Israel i stranhero pa ku e aliansanan di promesa" (Efe. 2:12) a wòrdu tresí serka den e sanger di Kristu. Kristu ta intersediendo e "aliansa na bo" (Heb. 9:15) pa tur kreyente, no importá nashonalidat òf rasa.
"Un Mihó Aliansa" (Heb. 8:6)
djarason, 02-06-2021
Ayera nos a mira ku den aspekto di e elementonan básiko, e aliansa bieu i nobo tabata meskos. E faktor fundamental ta salbashon pa medio di fe den un Dios ku lo pordoná nos pikánan, no pasombra tin nada digno den nos pero solamente pa motibu di Su grasia. Komo resultado di e pordon aki, nos ta drenta un relashon kun'É den kual nos ta someté na djE den fe i obedensia. Sin embargo, e buki di Hebreonan ta yama e aliansa nobo "un mihó aliansa." Kon nos por komprondé kiko esei ta nifiká? Kon un aliansa ta mihó ku e otro?
Unda e fayo tabata sinta den " frakaso" di e aliansa bieu? (Heb. 8:7, 8).
E problema ku e aliansa bieu no tabata e aliansa mes pero e fayo di e pueblo pa gara esaki den fe (Heb. 4:2). E superioridat ku e nobo tin riba e bieu ta sintá den ku Hesus-na lugá di wòrdu revelá solamente dor di sakrifisionan di animal (manera den e aliansa bieu) awor ta aparesé den realidat di Su morto i ministerio Sumosaderdotal. Ku otro palabra, e salbashon ofresé den e aliansa bieu ta e mesun ku esun ofresé den esun nobo. Den e nobo, sin embargo, un revelashon mas grandi i kompletu di e Dios di e aliansa i e amor ku E tin pa humanidat kaí a wòrdu revelá. E ta mihó den e sentido ku tur kos ku a wòrdu siñá dor di símbolo i tiponan den Tèstamènt Bieu awor a haña nan kumplimentu den Hesus, kende Su bida líber di piká, Su morto, i ministerio Sumosaserdotal a wòrdu simbolisá dor di e servisio dje santuario terenal (Heb. 9:8-14).
Awor, na lugá di simbolonan, tiponan i ehèmpelnan, nos tin Hesus mes, no solamente komo e lamchi matá ku a drama Su sanger pa nos piká (Heb. 9:12) pero ku ta para komo nos Sumosaserdote den shelu ministrando na nos fabor (Heb. 7:25). Aunke ku e salbashon ku E ta ofresé ta igual, e revelashon mas kompleto aki di Su mes i e salbashon ku por haña den djE, manera revelá den e aliansa nobo, ta hasié superior na esun bieu.
Lesa Hebreonan 8:5 i Hebreonan 10:1. Kua palabra e outor ta usa pa deskribí e servisionan di santuario di e aliansa bieu? Kon uzo di e palabra ei ta yuda nos komprondé e superioridat di e aliansa nobo?
Pensa tokante esaki: Dikon konosementu di Kristu Su bida, morto i ministerio Sumosaserdotal na nos fabor ta duna nos un mihó komprondementu di Dios ku un hende por risibí meramente for di e servisionan di ritual di sakrifisio di animal di e santuario terenal?
E Saserdote di e Aliansa Nobo
djaweps, 03-06-2021
E buki di Hebreonan ta buta un énfasis pisá riba Hesus komo nos Sumosaserdote den e santuario selestial. De paso, e eksposishon mas kla di e aliansa nobo ku ta wòrdu hañá den e Tèstamènt Nobo ta aparesé den e buki di Hebreonan ku su énfasis riba Kristu komo Sumosaserdote. Esaki no ta kasualidat. Kristu Su ministerio ta íntimamente ligá na promesanan di e aliansa nobo.
E servisionan di santuario di Tèstamènt bieu tabata e medionan pa dor di kua bèrdatnan tabata wòrdu siñá. E tabata sentrá den sakrifisionan i interseshon. Animalnan tabata wòrdu matá, i nan sanger tabata wòrdu intersedé dor di e saserdotenan. Esakinan dimes tabata símbolonan di e salbashon ku ta wòrdu hañá solamente den Hesus. No tabatin salbashon den nan mes.
Lesa Hebreonan 10:4. Dikon salbashon no por wòrdu hañá den e morto di e animalnan aki? Dikon e morto di un animal no ta sufisiente pa duna salbashon?
Tur e sakrifisionan aki, i interseshon di e saserdote ku tabata kompañá nan, a haña nan kumplimentu den Hesus. Hesus a bira e Sakrifisio riba kua e sanger di e aliansa nobo ta basá. Hesus Su sanger a ratifiká e aliansa nobo, hasiendo e aliansa di Sinaí i su sakrifisionan "bieu" òf inválido. E sakrifisio berdadero a wòrdu hasí, un biaha pa semper (Heb. 9:26). Unabes Kristu a muri, no tabatin nesesidat mas pa ningun animal wòrdu matá. E servisionan di e santuario terenal a kumpli nan funshon.
Lesa Mateo 27:51, kual ta konta kon e kortina den e santuario terenal a wòrdu di sker ora ku Hesus a muri. Kon e evento ei ta yuda nos komprondé dikon e santuario terenal a wòrdu remplasá?
Dimes huntu ku e sakrifisionan di animal tabatin e ministerio saserdotal, e Levítanan ku tabata ofresé i intersedé e sakrifisionan den e santuario terenal na fabor di e pueblo. Unabes e sakrifisionan a terminá, e nesesidat pa nan ministerio tambe a terminá. Tur kos a wòrdu kumplí den Hesus, kende awor ta ministrá Su propio sanger den e santuario den shelu (wak Heb. 8:1-5). Hebreonan ta enfatisá Kristu komo e Sumosaserdote den shelu, drentando dor di dramamentu di Su propio sanger (Heb. 9:12), intersediendo na nos fabor. Esaki ta e fundeshi i promesa ku nos tin den e aliansa nobo.
Kon e ta laga bo sinti ora bo komprondé ku asta awor Hesus ta ministrando Su sanger den shelu na bo fabor? Kuantu konfiansa i siguransa tokante salbashon esaki ta duna
Pa Mas Estudio:
djabierne, 04-06-2021
"Dor di partisipá ku Su disipelnan di e pan i e biña, Kristu a komprometé Su mes na nan komo nan Redentor. El a komprometé na nan e aliansa nobo, pa medio di kua tur ku risibiÉ ta bira yu di Dios, i ko-herederonan ku Kristu. Pa medio di e aliansa aki kada bendishon ku shelu por a drama den e bida aki i esun pa bini a bira di nan. E akto di aliansa aki mester a wòrdu ratifiká ku e sanger di Kristu. I atministrashon di e Sakramento mester a mantené dilanti di e
disipelnan e sakrifisio infinito hasí pa kada un di nan individualmente komo partí di e gran totalidat di humanidat kaí."-Ellen G. White, The Desire of Ages, p. 659.
"E karakterístika mas sorprende net di e aliansa di pas aki ta e rikesa ekstraordinario di e miserikòrdia pordonadó ekspresá na e pekador si e arepentí i bandoná su pikánan. E Spiritu Santu ta deskribí e evangelio komo salbashon pa medio di e miserikòrdia tierno di nos Dios. 'lo Mi tin miserikòrdia di nan inikidatnan," Señor ta deklará tokante esnan ku arepentí, 'i lo Mi no kòrda nan pikánan mas' (Heb. 8:12). Dios ta bira lomba pa hustisia ora ku E de mostrá miserikòrdia na e pekador? No; Dios no por deshonrá Su leí dor di permití esaki wòrdu transgresá sin konsekuensia. Bou di e aliansa nobo, obedensia perfekto ta e kondishon di bida. Si e pekador arepentí i konfesá su pikánan, lo e risibí pordon. Pa medio di Kristu Su sakrifisio na su fabor, pordon ta wòrdu sigurá pe. Kristu a kumpli e demandanan di e leí pa tur pekador ku kere i arepentí."-EllenG. White, God's Amazing Grace, p. 138.
Preguntanan pa Diskushon:
1. Kiko ta e bentaha di tin e leí skirbí den e kurason kontrali na únikamente riba tablanan di
piedra? Kua ta mas fásil pa lubidá, e leí skirbí riba piedranan òf e lei skirbí den e kurason?
2. For di e kaida di humanidat, salbasbon ta wòrdu hañá únikamente a traves di Kristu, asta si
e revelashon di e bèrdat ei ta varia den diferente épokanan di historia. E aliansa no ta traha na mesun manera?
3. Wak na e di dos sita di Ellen G.White den e estudio di awe. Kiko e kier men ku "obedensia
perfekto" komo e rekisito pa un relashon di aliansa? Ken ta e Úniko ku a rindi"obedensia perfekto"? Kon e obedensia ei ta kontestá e demandanan di e lei pa nos?
Resúmen: E aliansa nobo, ta un revelashon mas grandi, mas kompletu, i mas mihó di e plan
di Redenshon. Nos ku ta partisipá den dje, ta partisipá pa medio di fe, un fe ku lo manifestá su mes den obedensia na e leí skirbí den nos kurasonnan.
