Boutismo i Yenamentu di Spiritu Santu
Les 5 di kuartaal 1, aña 2017
Lesa pa e siman aki:
Marko 1:8; Efe. 5:18; Echonan 13:52; Lukas 11:8-10; Echonan 5:32; Gal. 5:16-26.
TEKSTO PRINSIPAL:
“E ladron ta bin solamente pa hòrta i mata i destruí; Ami a bin pa nan por tin bida, i pa nan tin e kompletamente” (Juan 10:10, NIV).
sabbat, 28-01-2017
Komo Kristiannan, nos mester ta yená ku Spiritu Santu. Sin djE nos testimonio lo ta sin poder, i nos bida Kristian lo no ta nada mas sino un karga. Nos lo por tin estudio, talento i elokuensha, pero sin e Spiritu nos no por eksperensiá bida manera Dios tabatin intenshon pa nos hasié. Nos lo no tin siguransa di salbashon i lo no konosé e goso ku ta surgi for di sirbi nos Señor. Nos lo ta Kristiannan pa nòmber so, i un Kristian solamente pa nòmber realmente no ta un Kristian ètòl.
Hesus, sinembargo, ke pa nos disfrutá di bida di forma kompletu. E ke duna nos bida manera mester ta, un bida satisfaktorio i ku nifikashon, pasobra e ta ankrá den e Fuente di tur bida: Hesukristu. E ta e Kreador di tur bida, i e úniko kaminda pa bida eterno. “Ami ta e kaminda, bèrdat, i bida. Ningun hende ta bin serka e Tata sino pa medio di Mi” (Juan 14:6, NKJV). E plenitut aki ta posibel solamente dor di ta uní kunE, i esaki por tuma lugá solamente pa medio di e obra di Spiritu Santu den nos bida.
E siman aki nos lo studia kiko Beibel ta bisa tokante boutismo di e Spiritu i kiko ke men pa ta yená kunE. Nos lo wak tambe algun evidensia ku ta testifiká ku di bèrdat nos ta yená ku e Spiritu.
Boutismo di Spiritu Santu
djadumingu, 29-01-2017
Lesa Marko 1:8 (kompará ku Mat. 3:11, Lukas 3:16, i Juan 1:33), Echonan 1:5 i 11:16. Kua otro rito di inisiashon ta bai huntu ku e boutismo di e Spiritu?
Den Tèstamènt Nobo tin solamente shete pasashi ku ta papia tokante ser batisá den Spiritu Santu. Kuater di e pasashinan aki ta bai bèk na Juan Boutista i ta mustra na Pentekòste. Aki Spiritu Santu a ser duná pa introdusí e kuminsamentu di “e último dianan” di historia di salbashon.
Juan, sinembargo, kontrali na e otro Evangelionan, no ta usa tempu verbal futuro ora e ta papia tokante boutismo di e Spiritu. En kambio, e ta hasi uso di partisipio presente, indikando ku esaki ta algu ku tin balides kontinuo (lesa Juan 1:33). E mesun tempu ta ser usá dor di Juan djis algun versíkulo promé den Juan 1:29, ora e ta papia tokante un otro obra importante di Hesus: kitamentu di e pikánan di mundu. E ministerio di Hesus ta konsistí den kita nos pikánan i den duna Spiritu Santu na nos. E eksperensia dòbel aki ta ser reportá tambe den Echonan 2:38. Despues ku nan wowonan a ser habrí na Kristu, e disipelnan a risibí tur dos: pordon di piká i Spiritu Santu. E mesun eksperensia ta ser reportá tokante e kreyentenan den kas di Cornelio den Echonan 10:43, 44, i mas despues den Echonan 11:16. Boutismo di awa ta konosí komo e boutismo di repentimentu (Echonan 19:4). Ora nos repentí di piká i ser batisá den nòmber di Hesus, nos tambe ta risibí Spiritu Santu (Echonan 2:28-39).
Den Tèstamènt Nobo, risibimentu di Spiritu Santu i boutismo ta pertenesé huntu. Nan ta señalá nos nasementu di nobo. Den boutismo nos ta ser identifiká ku Kristu, i Hesus ta duna nos Spiritu Santu pa nos por biba den Su poder i proklamá e bon nobo. E boutismo di e Spiritu no ta un segundo obra di grasia, na un etapa mas despues den bida, ku algun persona ta asosiá ku donnan milagroso.
Den 1 Kor. 12:13, Pablo no tin den mente e eksperensia úniko na Pentekòste sino mas bien e eksperensia di tur kreyente. E ta deklará ku pa medio di un Spiritu nos tur ta ser batisá den un kurpa, i tur a ser duná di bebe di un Spiritu. Pablo ta enfatisá unidat. E palabra “tur” ta krusial. Pablo ta konektá e inisiashon di tur kreyente den e kurpa di Kristu ku e boutismo di e Spiritu.
Kiko tabata bo propio eksperensia den ser batisá pa medio di e Spiritu Santu? Kiko E a nifiká pa bo bida? Kon lo bo tabata sin E obrando den bo bida?
Ser Yená Ku Spiritu Santu
djaluna, 30-01-2017
Lesa Efe. 5:18, Echonan 13:52, i Rom. 8:9. Kiko ta nifiká pa ta yená ku Spiritu Santu? Kon ser yená ku e Spiritu ta tuma lugá den nos bida?
Unabes nos ser batisá i ta pertenesé na Kristu, nos mester biba den poder di e Spiritu. Pa esaki sosodé nos mester ser yená ku e Spiritu. Tin un kantidat di referensia den Tèstamènt Nobo kaminda hende ta ser yená ku e Spiritu (Lukas 1:41, 67; Echonan 2:4; 4:8, 31; 9:17;
13:9). Apòstel Pablo ta uza e palabra yena pa bisa ku un persona a someté su mes
kompletamente na Dios i ta habrí pa e influensia guiadó di Spiritu Santu, pa Dios Su obra mes por ser kumplí den bida di e persona.
Si nos sede na influensia di alkohòl, nos kanamentu, papiamentu, i pensamentunan lo ser afektá negativamente. Ora nos ta yená ku Spiritu Santu, nos ta sede tur parti di nos bida na Su influensia transformador ku e resultado ku nos kanamentu, papiamentu, i pensamentunan lo reflehá Hesus.
Miéntras ku e Spiritu ta ser duná pa medio di e tendementu di fe (Gal. 3:2), i ta ser risibí pa medio di fe (Gal. 3:14) na nos boutismo (Tito 3:5, 6), nos mester buska e yenamentu di Spiritu Santu tur dia. Nos no por biba di un eksperensia poderoso ku nos tabatin aña pasá, òf luna pasá, òf asta ayera. Nos tin mester di e yenamentu ku Spiritu di Dios kada dia, pasobra kada dia ta trese su mes desafionan.
Den Echonan 13:52, e término griego pa yená ku e Spiritu ta den tempu imperfekto, loke ta nifiká akshon kontinuo. Literalmente e ta nifiká: “siendo yená (kontinuamente).” Siendo yená ku e Spiritu no ta un evenemento di un biaha. Ta algu ku nos mester buska i risibí tur dia. E yenamentu aki mester ser ripití pa tur parti di nos bida ta ser yená ku Su presensia, i asina nos ta risibí poder pa biba manera nos mester biba.
Siendo yená ku Spiritu Santu no ta nifiká asina tantu ku nos ta poseé mas di djE, sino ku E ta poseé mas di nos. Solamente ora nos ta entregá tur aspekto di nos bida na e Spiritu tur dia E por uza nos pa e gloria di Dios.
“Mi ta deseá di impreshoná riba bo e echo ku esnan ku tin Hesus bibando den e kurason pa medio di fe, berdaderamente a risibí Spiritu Santu. Tur individuo ku risibí Hesus komo su Salbador personal, ku tur seguridat ta risibí tambe Spiritu Santu pa ta su Konsoladó,
Kondishonnan: Parti 1
djamars, 31-01-2017
E Palabra di Dios ta mustra na sierto kondishonnan ku ta nesesario pa e Spiritu por biba den nos. Durante e siguiente dos dia nos lo wak algun ku ta importante.
Lesa Echonan2:37, 38. Kiko ta e promé kondishon pa risibí Spiritu Santu?
Un kondishon pa risibí e don di Spiritu Santu ta arepentimentu. Tendiendo e Palabra di Dios ta spièrta nos konsenshi i por hiba nos na un persepshon di nos berdadero pekaminosidat i kondishon pèrdí. Arepentimentu berdadero ta mas ku djis sinti duele pa e konsekuensianan desesperá di nos piká. E ta un kambio kompletu di kurason i mente pa nos mira piká pa loke e ta realmente: un maldat mahos i rebeldia kontra Dios. E úniko manera ku nos por eksperensiá berdadero arepentimentu ta pa ser toká pa e amor di Dios: “Òf boso ta pensa djis liheramente riba e rikesanan di Su amabilidat i toleransia i pasenshi, sin sa ku e kariño di Dios ta hiba boso na arepentimentu?” (Rom. 2:4, NASB).
Lesa Galationan 3:14 i Santiago 1:6-8. Dikon nos no por risibí Spiritu Santu sin konfia den e Palabra di Dios?
Hesus a primintí di manda e Spiritu komo Su representante. Den fe nos ta risibí e don primintí. Pero si nos ta duda den e promesa di Dios i no ta konfia Su Palabra, nos ta manera un persona di dòbel ánimo i no por spera di risibí nada for di Dios. Fe ta mas ku aprobashon intelektual. E ta enserá ponementu di nos bida riba e liña, konfiando ku Dios lo mantené Su Palabra i lo no defroudá nos, no importá kiko pasa.
Lesa Lukas 11:8-10, 13. Dikon interseshon persistente ta hasi diferensia?
Dios no ta duda pa duna nos e Spiritu. Dios ta bon i bondadoso, mas di loke nos por ta asta ku nos mes yunan. Nos interseshon persistente no ta kambia Su mente. Nos orashon ta kambia nos i ta trese nos den e presensia di Dios. Orashon no ta trese Dios abou serka nos, sino ta hiba nos ariba serka djE. Nos orashonnan simplemente ta revelá nos determinashon, i nan ta
Kondishonnan: Parti 2
djarason, 01-02-2017
Lesa Echonan 5:32. Dikon obediensia na e Palabra di Dios ta un kondishon importante pa risibí Spiritu Santu?
Den pasado, meskos ku awor, Spiritu Santu ta ser konsedé na tur ku obedesé Dios. Den Beibel, amor i obediensia ta kana man na man, i fe berdadero ta ser ekspresá den obediensia. Si nos konfia Dios di henter nos kurason, nos lo obedesé Su mandamentunan. Hesus a bisa: “Si kualke hende ta stima Mi, e lo warda Mi palabra” (Juan 14:23, NASB). Obediensia ta un eskoho ku ta hiba na un estilo di bida ku ta sigui Dios Su boluntat manera e ta ser ekspresá den Su lei. Nos mester kontinuá den obediensia si nos ke rekonosé Hesus komo nos Señor
(Lukas 6:46). Den Juan 2:4, 5 nos ta ser bisá ku “esun ku bisa: ‘mi konos’É,’ i no ta warda
Su mandamentunan, ta un mentiroso, i e bèrdat no ta den dje; pero esun ku warda Su palabra, den dje e amor di Dios berdaderamente a ser perfekshoná” (NASB). Eseinan ta palabranan fuerte. Nos sa di Juan tambe ku “esun ku warda Su matamentunan ta permanesé den djE, i E den dje. Dor di esaki nos sa ku E ta permanesé den nos, pa medio di e Spiritu ku E a duna nos” (1 Juan 3:24, NASB). Ora nos hasi loke ku Dios a manda, nos lo tin pas di mente.
Lesa Hudas 18-21. Dikon nos mester evitá tur impuresa si nos ke ser yená ku e Spiritu?
E kandela di Spiritu Santu no por sigui kima den nos bida ora nos mente ta fihá riba e kosnan di mundu. Spiritu Santu ta reakshoná masha sensitivo na eksistensia di tur piká i mundanalidat den nos bida. P'esei nos mester mantené nos mes den e amor di Dios i ta konektá ku Dios pa medio di orashon, pa nos por evitá tur impuresa i manifestá un spiritu di poder, amor, i disiplina (2 Tim. 1:6, 7). Solamente dor di un bataya djaserka i feros ku e ami nos por ta e tipo di hende ku nos mester bira. Naturalmente, nos no por hasié nos mes; e bataya mester bira nos eskoho di sea entregá nos boluntat na e konvikshon di Spiritu Santu, òf permití e karni dominá. E eskoho ta di nos.
“No tin límite na e utilidat di esun ku, dor di pone e ami un banda, ta traha espasio pa e obra di Spiritu Santu riba su kurason, i biba un bida totalmente konsagrá na Dios.”?Ellen G. White,
The Desire of Ages, p. 250, 251. Kon bo por apliká e palabranan aki na bo propio bida
spiritual?
Bida Sentrá Den e Ami Versus Bida Sentrá Den Kristu
djaweps, 02-02-2017
Lesa Galationan 5:16-26 i kompará esaki ku Efesionan 5:1-9, 17-20. Traha un lista di e diferensianan ku tin entre un bida sentrá den e ami i un bida ku ta yená ku e Spiritu.
Bida di un hende ku no ta biba den e Spiritu ta radikalmente diferente for di e bida i balornan di un persona ku ta yená ku e Spiritu.
Persona Sentrá den e Ami Persona Sentrá den e Ami
Ta deseá loke ta pekaminoso i ta desagradá Dios Ta deseá loke ta spiritual i ta agradá Dios
Ta ser kontrolá dor di pashonnan pekaminoso Ta ser kontrolá dor di e Spiritu
Ta malusá su libertat i ta bira katibu di piká Ta ser librá for di sklabitut di piká i ta ser yamá na libertat den Kristu
Ta desobediente na boluntat di Dios Ta obediente na boluntat di Dios
Ta satisfasé e ami Ta sakrifiká e ami
Ta manifestá e fruta di piká Ta manifestá e fruta di Spiritu
No ta rekonosé e nesesidat di pordon i ta broma ku e ami Ta rekonosé e nesesidat di pordon i ta alabá Hesus pa loke E a hasi
Bida di un persona ku ta yená ku e Spiritu di Dios ta karakterisá dor di un obedensia amoroso na e lei di Dios i un spiritu suave di kompashon pa otronan (lesa 2 Kor. 5:14, NASB). Siendo renobá den nos mente i pensamentu, i dor di a risibí un kurason nobo i un vishon nobo riba bida, nos balornan i komportashon lo kambia. Nos no ke biba nos bida mas den nos propio forsa ma den sumishon na Spiritu Santu (Gal. 3:3).
Nos no por transformá nos mes. Nos no ta poseé poder real pa kambia nos mes, pasobra piká ta demasiado ankrá den nos. E energia ku ta renobá mester bini for di Dios. E kambio di paden por ta eksitoso solamente atraves di e obra transformador di Spiritu Santu. No ta djis kambio eksterno, manera koregí e mal hábito aki òf esun aya, ta hasi nos Kristian. E kambio mester bin for di un kurason renobá dor di Spiritu Santu.
Esaki ta obra di henter un bida, un obra ku lo tin su bon i mal tempunan, pero un obra ku Dios ta primintí di hasi den nos si nos someté na djE, “siendo sigur di e kos aki mes, ku Esun ku a kuminsá un bon obra den boso, lo komplet’é den boso te na e dia di Hesukristu” (Fil. 1:6,
Pa mas Estudio
djabierne, 03-02-2017
Ta natural pa kualke persona buska di tin kòntròl riba su mes bida. Normalmente nos ta dependé riba nos propio esfuersonan pa alkansá tur loke ku nos por. Miéntras hopi hende ta pasa nan bida den un búskeda di kòntròl, otronan tin un temor insaludabel pa pèrdè kòntròl. E dilema humano aki ta haña kontesta solamente den Dios. E ke pa bo duna É, ku ta bo Kreador i Redentor, kòntròl total. E konosé bo i ta stimabo manera ningun otro hende por. Esaki ta habri porta pa E obra den bo bida. Dor di skohe pa someté bo boluntat na e direkshon di e Spiritu Santu di Dios, lo bo tin Su pas sobrenatural i oportunidatnan ilimitá pa ta un bendishon pa otronan. Pero nos mester tin e deseo pa e poder aki den nos bida. Dios no ta fòrsa Su mes riba ningun di nos. Pa nos ta sernan moral nos mester ta sernan liber. I pa ta berdaderamente liber den Kristu, nos mester di un sentido di abandono (esun di ke bandoná nos maneranan pekaminoso bieu i kaí) i un sentido di permanensia (esun di permanesé den e poder di Spiritu Santu). Pa ta berdaderamente liber, nos mester ta berdaderamente someté na e kòntròl di Spiritu Santu. Pero no tin kontradikshon aki. Nos libertat ta ser hañá den liberashon for di kondenashon i poder di piká, kua semper ta hasi nos esklabo i semper ta hiba na morto. En kambio, dor di someté na Señor i habri kaminda pa Spiritu Santu biba den nos, no solamente nos no ta kondená mas (lesa Rom. 8:1), sino nos ta biba un bida kaminda ku nos “no ta kana di akuerdo ku e karni, sino di akuerdo ku e Spiritu” (NKJV). Esei ta e úniko libertat berdadero ku nos, komo sernan pekaminoso i kaí, hamas por konosé.
Preguntanan di Diskushon:
1. Algun hende ta pensa ku libertat ta konsistí di ta kapas pa hasi loke bo ke, ora bo ke, i na e manera ku bo ke hasié. Ki problema tin ku e konsepto ei, for di un perspektiva Kristian? Kiko ta e idea bíbliko di berdadero libertat? (Lesa Salmo 119:45; Lukas 4:18;
Juan 8:34-36; 2 Kor. 3: 17; Gal. 5:1.)
2. Dikon ta importante pa pone e ami un banda i konsagrá nos bida kompletamente na Dios promé ku Spiritu Santu por obra poderosamente atraves di nos? Kiko Dios por hasi den bo ku lo por hasibo un bendishon mas grandi pa otronan si bo pone e ami un banda i habri bo kurashon na e obra di Spiritu Santu den bo?
3. “E bida Kristian no ta un modifikashon òf mehorashon di esun bieu, ma un transformashon di naturalesa. Tin un morto na e ami i piká, i un bida kompletamente nobo. E kambio aki por ser efektuá solamente dor di e obra efikas di Spiritu Santu.”?Ellen G. White, The Desire of Ages, p. 172. Diskutí den klas e implikashonnan di e palabranan aki.
Powered by TCPDF (www.tcpdf.org)
