Kon Pa Dil Ku Mal Desishonnan
Les 12 di kuartaal 4, aña 2019
Lesa pa e siman aki:
Neh. 13:23-25; Deut. 7:3, 4; 2 Kor. 6:14 Esdras 9,10; 1 Kor. 7:10-17.
TEKSTO PRINSIPAL:
"I mi a bisa: 'O mi Dios, mi tin berguensa, i mi ta sintimi Umiyá I mi tin berguensa di hisa mi kara na Bo, mi Dios, pasobra nos inikidatnan a multipliká riba nos kabesnan, i nos kulpa a
krese yega te na e shelunan’ ” (Esdras 9:6).
Kon Pa Dil Ku Mal Desishonnan
sabbat, 14-12-2019
Esdras i Nehemias a bira lidernan den komunidatnan kaminda matrimonio miksto ku no Istraelitanan a bira e norma. Ambos líder tabata sumamente preokupá tokante e asuntu aki, pasobra nan tabata ke a guia e nashon den un relashon será ku Dios. Nan tabata konsiente di e influensia negativo ku no-kreyentenan òf adoradónandi diosnan falsu por tin riba e pueblo di Israel, pasobra nan a mira e teribel efektonan atraves di historia. E religionnan Kaananeo a plama rònt Israel te ora Baal i Asera tabata wòrdu adorá tur seru haltu. Ademas, e influensia ku e esposanan pagano tabatin riba e famianan Israelita tabata perhudikabel. Balaam a konseha e Moabitanan pa manda nan muhénan serka e Israelitanan, sigur di ku e Israelitanan lo bira kara for di Dios ora ku nan kai pa e muhénan aki. Desafortunadamente, e tabatin rason.
E Reakshon di Nehemias
djadumingu, 15-12-2019
Lesa Nehemias 13:23-25. Kiko a pasa aki, i kon nos por splika Nehemias su reakshon riba e situashon?
Ya komo e muchanan no por a papia Arameo (idioma ku nan a usa durante e Eksilio) òf Hebreo, nan no por komprende e siñansanan di den Skritura. Esaki tabata un berdadero problema, pasobra konosementu di Dios su revelashon por wòrdu trosé òf asta disparse. E eskribanan i saserdotenan tabata eksponé e Tora mayormente den Aramei pa nan por hasi e predikashi mas komprendibel pa e pueblo. Pero, komo ku e mamanan tabata for di Amon, Asdod, i Moab i generalmente e promé kuidadó di e muchanan, no ta nada straño ku e muchanan no ta papia e idioma di e tatanan tampoko. E idioma ku nos ta papia ta informa e manera ku nos ta pensa di konseptonan, pasobra nos ta usa e vokabolario di e kultura ei. Pa pèrdè e idioma bibliko lo kemen pèrdè nan identidat spiritual. P'esei, Nehemias no kier a ni pensa ku e famianan tabata perdiendo nan kontakto ku e Palabra di Dios i konsekuentemente nan konekshon ku e Dios bibu, e Señor di e Hebreonan. lntelektualnan bibliko a apuntá ku Nehemias su akshonnan kasi sigur tabata pa pone e pueblo na bergwensa publiko komo partí di e kastigu preskribí e tempu ei. Ora ku e ta bisa ku Nehemias a pleita i maldishoná nan, nos no mester pensa ku Nehemias a usa palabra malu i papiá mahos, pero mas bien e tabata papiando ku nan over di e maldishonnan di e Pakto/Aliansa. Deuteronomio 28 ta deliena e maldishonnan ku lo sosodé ku esnan ku kibra e pakto/aliansa. Ta bien posibel ku Nehemias a skohe e palabranan di Beibel pa laga nan realisá nan echonan robes i e konsekuensia di nan mal skohementu. Ademas, ora ku e versikulo ta bisa ku Nehemias "a dal algun di nan i ranka nan kabei" (Nehemias 13:25), enbes di mira Nehemias den un rabia i reakshonando ku furia, nos mester nota ku e dalmentu ei tabata un forma preskribi di kastigu publiko. E tipu di komportashon aki tabata wòrdu apliká solamente na "algun" di nan, ke men na e lidernan ku a kousa òf propagandá e mal komportashon aki. E aktonan aki tabata sirbi komo metodo pa duna bergwensa publiko. Nehemias tabata ke ta sigur ku e pueblo a komprendé e gravedat i seriedat di nan eskoho i e resultado ku lo surgi for di nan.
Kon nos lo reakshoná ora ku nos mira loke nos ta kere ta robes-wòrdu hasí den Iglesia?
Nehemias su Reprendementu
djaluna, 16-12-2019
Lesa Nehemias 13:26, 27. Kiko esaki ta mustra nos tokante e importansia di historia bibliko pa informa nos tokante e peligernan di desvia for di e kaminda korekto?
Salomon a kai den piká mas pròfundo dor di e eskohonan ku el a hasi. Lo tabata korekto pa bisa ku Salomon a kousa su propio destrukshon dor di desobedesé Dios su mandato pa e reinan di Israel: "Ni e [e rei] no mester tuma hopi esposa pa su mes, pa su kurason no desviá" (Deut. 17:17). E bida di Salomon ta wòrdu usá komo un ehèmpel negativo: No solamente el a kasa mas ku un muhé, pero signifikativamente, manera Nehemias ta bisa, el a skohe muhénan ku no tabata adoradónan di Dios.
Di kon Nehemias tabata korekto den reprendé e nashon pa kasamentu miksto ku paganonan? Gen. 6:1-4; Gen. 24:3, 4; Gen. 28:1, 2; Deut. 7:3, 4; and 2 Kor. 6:14.
E mandato pa no tin matrimonio miskto no tabata tokante nashonalismo pero tokante idolatria. Den Beibel tin hende ku a kasa ku no-Israelita. Moises a kasa ku Zipora, un muhé Midianita; Boaz a kasa ku Ruth, un Moabita. En kambio, e asuntu ku matrimonio miksto den e mandatonan aki ta enkuanto kasa un hende ku ta di otro fe [kreensia] òf no tin fe mes. E problema tabata ku e hendenan den tempu di Esdras i Nehemias no a skohe pa kasa ku hendenan ku ta kere den Dios. Richard M. Davidson, den Flame òf Yahweh (Peabody, Mass.: Hendrickson Publishers, 2007), ta deklará: "E plan pa matrimonio den Eden... a pidi un totalidat komplementario di dos sosio den fe spiritual, komo tambe den otro balornan signifikante."-pagina 316. E esposanan pagano den e historia aki no a skohe pa renunsiá adorashon idólatra. Konsekuentemente, kisas Nehemias tabata mas tristu ku e tabata rabiá dor di e eskohonan di e pueblo, ya ku pa Nehemias esaki ta muestra di falta di berdadero dedikashon na Dios.
Kua prinsipionan nos por saka for di e kuentanan di awe ku por yuda nos protehá nos fe i esun di nos famia?
Esdras ta Reakshoná
djamars, 17-12-2019
Lesa Esdras 9. Kon Esdras a reakshoná ora el a tende di matrimonionan miksto di e lsraelitanan? Esdras 9:1 i 2 ta deklará ku e pueblo "no a separá nan mes." E palabra "separá" ta wòrdu usá den e siguiente versikulonan tambe: Lev. 10:10; Lev. 11:47; Eksodo 26:33; Gen. 1:4, 6, 7, 14, 18. Kiko uso di e palabra aki ta implika riba e tema di un kreyente ku ta kasa ku un inkredulo?
E pueblo mes a aserká Esdras ku e asuntu di matrimonio miksto. E terminologia ku nan a usa pa menshoná e nashonnan enbolbí den abominashonnan ta mustra nan konosementu di e Tora, pasobra nan a kue e lista direktamente for di kuentanan bibliko. Interesantemente, e lidernan sivil a hiba notisia pa Esdras, i asta e lidernan spiritual di e nashon, saserdote i Levitanan, tabata kulpabel di e transgreshon aki. "Den su estudio di e lokenan ku a hiba na e koutiverio na Babilonia, Esdras a haña sa ku e apostasia di Israel tabata den gran parti pa motibu di a meskla ku nashonnan pagano. El a mira ku si nan a obedesé Dios su mandato pa keda separá for di e nashonan alrededor, nan lo a skapa di hopi eksperensia tristu i humiliante. Awor ku el a haña sa ku apesar di e lesnan di pasado, hòmbernan prominente a tribi kibra e leinan ku a wòrdu duná na nan pa warda nan for di apostasia, su kurason a agitá den su kurpa. El a pensa riba e bondat di Dios den bolbe duna Su pueblo un apoyo den nan patria, i el a yena ku indignashon hustu i ku tristesa pa nan malagradesido."-Ellen G. White, Prophets and Kings, p. 620. E palabra "separá" ta wòrdu usá pa kontraste di entidatnan. De fakto, e ta indiká oposishon total. Ku e deklarashon aki e hendenan a rekonosé un komprendementu previo i konosementu di Dios su mandato pa keda leu for di religionnan falsu. Nan a komprendé ku ningun hende por bisa ku e lo kasa ku un persona kende su kreensia kontrali lo no tin impakto riba e relashon matrimonial òf e manera ku nan lo lanta nan yunan. Nan a realisá kon serio e situashon a bira.
Kiko nos por hasi pa logra mantené e fe bibu den nos hogar i famia, asta si den pasado nos a tuma desishonnan robes?
Esdras ta Aktua
djarason, 18-12-2019
Lesa Esdras 10. Kon Esdras i e lidernan a atende e problema di matrimonio miksto?
Huntu, henter e asamblea a disidi na manda e esposanan stranhero bai. Asombrosamente, asta esnan ku a kasa ku nan tabata di akuerdo ku e plan, eksepto e kuater hòmbeman ku a wòrdu menshoná na nòmber den Esdras 10:15. E Hudiunan a primintí na manda nan esposanan bai, i a dura tres luna pa e plan wòrdu ehekutá. Na final, 113 hòmber Hudiu a manda nan esposa bai (Esdras 10:18-43). Interesante ta ku, e último versikulo (Esdras 10:44) ta bisa ku algun di e matrimonionan miksto tabatin yu kaba. Pa manda e mamanan bai laga e famia ku muchanan atras no ta parse rashonal ni tampoko korekto pa nos. Sinembargo, nos mester kòrda ku esaki tabata e úniko biaha kaminda Dios a kuminsá di nobo ku e nashon Hudui, i, den un sentido, nan kunE. Pa sigui Dios kompletamente ta rekerí medidanan radikal. E palabranan spesífiko ku a wòrdu usá den Esdras 10:11, 19 pa "separa boso mes" (badal) i "pone un banda" (yatza ') no ta wòrdu usá ningun otro kaminda den Skritura pa divorsio. Esdras lo tabata sa e terminologia ku normalmente ta wòrdu usá pa divorsio, pero el a skohe pa no usé. Ke men, ta evidente ku Esdras no tabata konsiderá e matrimonionan aki balido despues ku a deskubri ku nan tabata den violashon di e mandato di Tora. Ku otro palabra, e matrimonionan a wòrdu anulá pasobra nan tabata kontrali na lei. E proseso tabata pa disolve e matrimonionan invalido. Sinembargo, nos no a haña e informashon di loke a pasa ku e esposanan i muchanan i ki impakto e akto aki tabatin riba e komunidat. Di akuerdo ku kustumber di e tempu ei, e eks-esposo previo lo tabatin ku soru pa e tranferensia di e esposa anterior i nan yunan. Normalmente e esposanan lo a bai bek na kas di nan mayornan. Sinembargo, despues di tempu, algun hòmber Hudui a kuminsa unbiaha mas ku kasamentu ku inkredulonan, i kisas algun a hasta a bolbe serka e esposanan ku nan a manda bai. E naturalesa pasahero di e solushon por wòrdu atribuí na e naturalesa humano i nos siklo sende-paga di entrega na Dios. Asta esnan di nos ku no ta konsidera nos mes kreyentenan fuerte tin ku atrniti ku nos a pasa periodonan largu di menos dedikashon na Dios ora ku nos kaminata kunE por di un manera presis por wòrdu deskribi di tin fayo. Desafortunadamente, humanidat ta lucha ku e asuntu di pone Dios promé.
Matrimonio di Awendia
djaweps, 19-12-2019
For di loke nos a mira den Esdras i Nehemias tokante e problema di matrimonio miksto, ta keda bon kla ku Dios ta tuma matrimonio hopi na serio, i nos tambe lo mester hasié. Pa medio di orashon nos mester konsidera un potenshal pareha pa matrimonio i nos mester inklui Dios den e tumamentu di desishon. I nos lo mester disidí pa ta fiel na e prinsipionan di Dios, kual por proteha nos for di hopi tristesa i miseria.
Buska kon Pablo tabata dil ku e asuntu aki ora ku un Kristian tabatin un pareha no kreyente. Studia 1 Korintionan 7:10-17 ku atenshon. Kon nos lo mester aserka matrimonionan ku awendia ta di fe diferente?
Pasobra den Beibel nos no tin un mandato detayá di kiko pa hasi ku matrimonionan interreligioso/miksto den fe, lo no ta sabí i lo ta kontrali na intenshon di e versikulo i su prinsipionan pa insistí ku e kreyente mester separá for di su pareha no kreyente ta e kos korekto pa hasi i, segun Esdras, ta esei mester hasi. E situashon di Esdras-Nehemias tabata un evento di un solo biaha i di akuerdo ku boluntat di Dios (Esdras 10:11), pasobra e futuro i adorashon di henter e komunidat di Israel tabata kore peliger. Nan tabata perdiendo nan identidat komo adoradónan di un Dios bibu. Nos sa ku den e akuerdo Elefantin Hudiu na Egipto (pareu ku temporada di Esdras i Nehemias), e lidernan a permití matrimonio mesklá i a desaroyá un religion miksto ku Yahweh i su konsorte pagano, e diosa Anat. Ademas, e linea mesianiko tabata na peliger. P'esei, e evento di un solo biaha aki no mester wòrdu tumá komo un resta pa kibra matrimonionan i famianan ki ora ku un kreyente kasa ku un no-kreyente. Enkambio, e historia ta mustra e balor altu ku Dios ta pone riba pareha di e mes kreensia den matrimonio. Satanas ta felis ora ku nos kasa ku un persona ku no ta kurashá devoshon na Dios, pasobra e sa ku si tur dos pareha tin mesun konvikshon, nan lo ta mas fuerte den nan obra mishonero pa Dios ku ora ta un so ta fiel. Mientras ku klaramente Beibel su konseho ta kontra matrimonio di yugo desigual (2 Korintio 6:14), nos tambe ta haña pasashinan di grasia ekstendé na esnan ku a kasa no kreyente i tòg keda fiel na Dios i na nan pareha. Dios no ta bandoná nos ni ora ku nos tuma desishonnan kontrali na Su boluntat, i si nos pidiE yudansa, E lo proveé yudansa. Esaki no ke men ku nos ta hasi loke nos kier i despues verwagt Dios pa bendishoná nos tòg, pero mas bien ora ku nos yega serka djE ku un nesesidat i un kurason humilde, semper E ta skucha nos. Sin Dios su grasia lo no tin speransa pa ningun di nos, pasobra nos tur ta pekador.
Mas estudio:
djabierne, 20-12-2019
Ellen G. White, "Reformation,"pp. 669-678 den Prophets and Kings./PR, pp. 494-501. "E diligensia den kumpli ku e deber ku Dios a mustra nos ta un parti importante di e berdadero religion. Hende mester probecha di sirkunstansianan komo instrumentonan di Dios pa kumpli ku Su boluntat. UN akshon rapido i desisivo na e momentu korekto lo tin triunfo glorioso, mientras ku tardansa i negligensia lo resultá den fayo i desonra pa Dios. Si e lidernan den e kousa di bèrdat no mustra zelo, si nan ta indiferente i sin propósito, iglesia lo ta negligente, floho, i stimadó di plaser: pero si e lidernan ta yen di proposito santu pa sirbi Dios i E so, e pueblo lo ta uni yen di speransa, i alerta. E palabra di lo abundá den kontrastenan notabel i skerpi. Piká i santidat ta wòrdu poné kada un banda, asina ku, kontemplando, nos lo por hui esun i aseptá e otro. E paginanan ku ta deskribí e odio, falsedat, i traishon di Sanbalat i Tobías, tambe ta deskribí e noblesa, devoshon, i sakrifisio propio di Esdras i Nehemias. Nos ta liber pa kopia un di nan dos, segun ku nos mes skohe. E resultado temeroso di kibra e mandamentunan di Dios ta poné komo kontraste di e bendishonnan ku ta bin dor di obedensia. Nos mes mester disidí ku sea nos lo sufrí esun òf gosa di e otro."-Ellen G. White, Prophets and Kings, p. 676/PR, p. 499.
Preguntanan di diskushon:
1. Segun ku nos ta lesa e historianan aki, ta parse nos kla ku na promé lugá mayoria di e pueblo no tabata dediká na Dios, ta pesei nan a skohe esposanan pagano. P'esei, Esdras no a djis laga nan pa nan kuenta pero a trata na reprendé i korehí nan sperando di logra un kambio. Awo, e kambio a sosodé? Dor di kambia nan komportashon, nan a kambia di paden? Di bèrdat nan devoshon pa Dios a krese? Kua evidensia nos tin ku mayoria di nan no a kambia realmente? Kiko nos por siña for di nan fout tokante kon importante berdadero kambia di kurason ta?
2. Kual ta e maneranan ku nos por yuda esnan den nos iglesia ku por ta luchando ku e problemanan ku ta bin di matrimonionan imprudente?
3. Ounke e prinsipionan di Dios ta eterno i apsoluto, kulturanan ta varia grandemente. Di kon nos mester tene e dos diferensianan aki na mente segun ku nos ta apliká e prinsipionan di Dios na nos propio bida i situashon?
