YUNAN DI E PROMESA
Les 10 di kuartaal 4, aña 2017
Lesa pa e siman aki:
Romanonan 9:1-33
TEKSTO PRINSIPAL:
"Asina anto E tin miserikòrdia di esun ku E kier, i E ta enduresé esun ku E kier" (Romanonan 9:18).
YUNAN DI E PROMESA
sabbat, 02-12-2017
MANERA TA PARA SKIRBI, Jakob Mi a stima, ma Esau Mi a odia. Pasobra E ta bisa Moises, Lo Mi tin miserikòrdia di esun ku Mi tin miserikòrdia, i lo Mi tin kompashon di esun ku Mi tin kompashon" (Rom. 9:13, 15).
Tokante kiko Pablo ta papiando aki? Ki tal di libertat humano i e libertat pa skohe, sin ku masha poko di loke nos ta kere tin sentido? Nos no ta liber pa skohe òf rechasá Dios? òf e versikulonan ei ta siñando ku sierto hende ta skohé pa ta salba i otronan pa ta pèrdi, sin importá nan propio eskohonan personal?
E kontesta ta haña, manera usual, dor di mira na e kuadro mas grandi di loke Pablo ta bisando. Pablo ta sigui un liña di argumento den kua e ta atentá na mustra Dios Su derechi pa skohe esnan ku E lo usa komo Su "skohinan." Despues di tur kos, Dios ta Esun ku ta karga e responsabilidat máksimo di evangelisá e mundu. Dor di esei, dikon E no por skohe komo Su agentenan ken sea E ke? Miéntras tantu ku Dios no kòrta niun hende for di e oportunidat di salbashon, un akto asina di Dios Su parti no ta kontrali na e prinsipionan di boluntat liber.
Ainda mas importante, e no ta kontrali na e gran bèrdat ku Kristu a muri pa tur hende, i Su deseo tabata pa tur hende tin salbashon.
PABLO SU KARGA
djadumingu, 03-12-2017
"I boso lo ta pa Mi un reino di saserdotenan i un nashon santu. Esakinan ta e palabranan ku bo mester papia ku e yunan di Israel" (Eks. 19:6).
Dios tabatin mester di un pueblo mishonero pa evangelisá un mundu saturá den paganismo, skuridat, i idolatria. El a skohe e Israelitanan i a revelá Su Mes na nan. El a plania pa nan bira un nashon modelo i asina atraé otronan na e berdadero Dios. Tabata e propósito di Dios ku pa medio di e revelashon di Su karakter dor di Israel ku e mundu lo wòrdu atraé na djE. Dor di siñansa di e servisio di sakrifisio, Kristu mester wòrdu eksaltá dilanti e nashonnan, i tur ku mira na djE lo biba. Na medida ku e kantidat di Israel tabata oumentá, na medida ku nan bendishon tabata krese, nan lo amplia nan frontera te ora ku nan reino brasa e mundu.
Lesa Romanonan 9:1-12. Ki punto Pablo ta hasiendo aki tokante e fieldat di Dios meimei di fayonan human?
Pablo ta konstruyendo un liña di argumento den kua e lo mustra ku e promesa hasi na Israel no a faya kompletamente. Ta eksisti un remanente dor di kua Dios ainda ta aspirá pa obra. Pa establesé e balides di e idea di e remanente, Pablo ta bai bek den e historia di e Israelita. E ta mustra ku Dios semper tabata selektivo: (1) Dios no a skohe tur e simia di Abraham pa ta Su pakto, solamente e liña di Isaak. (2) E no a skohe tur e desendientenan di Isaak, solamente esnan di Jakob.
Ta importante, tambe, pa mira ku herensia, òf antepasadonan, no ta garantisá salbashon. Bo por ta di e sanger korekto, e famia korekto, asta di e iglesia korekto, i tòg ainda ta pèrdi, tòg ta pafó di e promesa. Ta fe, un fe ku ta obra dor di amor, ku ta revelá esnan ku ta "yunan di e promesa" (Rom. 9:8).
Mira na e frase den Romanonan 9:6: "Pasobra no ta tur ku ta desendiente di Israel." Ki mensahe importante nos por haña einan pa nos mes, komo Adventistanan, ku den hopi manera ta hunga e mesun ròlnan den nos era ku e Israelitanan a hasi den dianan?
SKOHÉ
djaluna, 04-12-2017
"A wòrdu bisá na Rebeka: "Esun mayó lo sirbi esun mas chikitu. Manera ta pará skirbi, Jakob Mi a stima, ma Esau Mi a odia" (Rom. 9:12, 13).
Manera a wòrdu deklará den e introdukshon pa e siman aki, ta imposibel pa komprondé Romanonan 9 apropiadamente te ora ku bo rekonosé ku Pablo no ta papiando di salbashon individual. E ta papia aki di ròlnan partikular ku Dios ta invitá sierto individuonan pa hunga.
Dios tabata ke pa Jakob ta e progenitor di e pueblo ku lo ta Su agensia speshal di evangelisá den e mundu. No tin implikashon den e pasashi aki ku Esau lo no por wòrdu salba.
Lesa Romanonan 9:14, 15. Kon nos ta komprondé e palabranan aki den e konteksto di loke nos tabata lesando?
Un biaha mas Pablo no ta papiando di salbashon individual, pasombra den e area ei Dios ta ekstendé miserikòrdia na tur, pasombra E "ta deseá pa tur hende wòrdu salbá" (1 Tim. 2:4). "E grasia di Dios a paresé, tresiendo salbashon na tur hende" (Tito 2:11). Pero Dios por skohe nashonnan pa hunga e ròlnan, i ounke ku nan por ninga na hunga e ei, nan no por preveni Dios Su eskoho. No importá kuantu Esau lo tabata deseá, e no por a bira e progenitor di e Mesias ni di e pueblo skohi. Na final, no tabata un eskoho arbitrario di parti di Dios, no algun dekreto divino, dor di kua Esau a wòrdu eksklui for di salbashon. E donnan di Su grasia dor di Kristu ta grátis pa tur. Nos tur a wòrdu skohe pa ta salba, no pèrdi (Efe. 1:4, 5; 2 Ped. 1:10).
Ta nos propio eskohonan, no di Dios, ku ta mantené nos for di e promesa di bida eterno den Kristu. Hesus a muri pa kada ser humano. Sinembargo, Dios a establesé den Su Palabra e kondishonnan riba kua kada alma lo wòrdu skohe pa bida fe eterno den Kristu, kua ta guia e pekador hustifiká na obediensia.
Komo si fuera niun otro hende ta eksisti, abo, bo mes, a wòrdu skohe den Kristu asta promé ku e fundashon di e mundu, pa por tin salbashon. Esaki ta bo yamada, bo eskoho, tur duna na bo dor di Dios atraves di Hesus. Ki un privilegio, ki un speransa!
Konsiderando tur kos, dikon tur otro kos ta blikia den komparashon ku e promesa grandi aki? Dikon e lo ta e tragedia di mas grandi pa laga piká, mes, i e karni kita for di bo tur loke a wòrdu priminti na abo den Hesus?
MISTERIONAN
djamars, 05-12-2017
"Pasobra Mi pensamentunan no ta boso pensamentunan, ni boso kamindanan no ta Mi kamindanan, Señor ta deklará. Pasobra meskos ku e shelunan ta mas haltu ku tera, asina Mi kamindanan ta mas haltu ku boso kamindanan, i Mi pensamentunan mas haltu ku boso pensamentunan" (Isa. 55:8, 9).
Lesa Romanonan 9:17-24. En bista di lokual nos a lesa te ainda, kon nos mester komprondé Pablo su punto aki?
Dor di dil ku Egipto na e momentu di e Eksodo den e forma ku El a hasié, Dios tabata obra pa e salbashon di e rasa humano. Dios Su revelashon di Su mes den e plaganan di Egipto i den e liberashon di Su pueblo tabata diseñá pa revelá na e Egipsionan, meskos tambe na otro nashonnan, ku e Dios di Israel berdaderamente tabata e Dios berdadero. E tabata diseñá pa ta un invitashon pa e pueblonan di e nashonnan pa bandoná nan diosnan i bini i ador'E.
Ta opvio ku ya kaba Fárao a hasi su eskoho kontra di Dios, asina ku den hasi su kurason duru, Dios no a korte for di e oportunidat di salbashon. E duresa tabata kontra e yamada di laga Israel bai, no kontra e yamada di Dios pa Fárao aseptá salbashon personal. Kristu a muri pa Fárao meskos tambe pa Moises, Aaron, i e sobra di e yunan di Israel.
E punto krusial den tur esaki ta ku komo ser humano kaí nos tin un bista asina chikitu di e mundu, di realidat, i di Dios i kon E ta obra den e mundu. Kon nos por spera pa komprondé tur e kamindanan di Dios ora ku e mundu natural, tur kaminda ku nos bira, tin misterionan ku nos no por komprondé? Despues di tur kos, tabata solamente den e 171 añanan ku a pasa ku dòkternan a siña ku lo ta un bon idea pa laba nan mannan promé di ehekutá un operashon! Ta asina sukumbi den ignoransia nos a tabata. I ken sa, si tempu mester dura, ki otro kosnan nos lo diskubri den e futuro ku lo revelá djis kon sukumbi den ignoransia nos ta awe?
Siertamente no semper nos lo komprondé e maneranan di Dios, pero Hesus a bini pa revelá na nos kon Dios ta (Juan 14:9). Dikon, anto, meimei di tur misterionan di bida i eventonan inesperá, ta asina krusial pa nos permanesé den e karakter di Kristu i loke El a revelá na nos tokante Dios i Su amor pa nos? Kon konosé kon Dios Su karakter ta, por yuda nos pa keda fiel meimei di pruebanan ku ta parse asina inhustifiká i asina di mala fe?
AMMI "MI PUEBLO"
djarason, 06-12-2017
Den Romanonan 9:25 Pablo ta sita Oseas 2:23, i den Romanonan 9:26 e ta sita Oseas 1:10.
E bekground ta ku Dios a instrui Oseas pa tuma "un esposa di prostitushon" (Os. 1:2) komo un ilustrashon di Dios Su relashon ku Israel, pasombra e nashon a bai tras di diosnan straño. E yunan ku nase for di e matrimonio aki a wòrdu duna nòmbernan ku ta nifiká Dios Su rechaso i kastigu di Israel idolatrá. E di tres yu a wòrdu yama Lo-ammi (Os. 1:9), ku literalmente ta nifiká
"no mi pueblo."
Sinembargo, meimei di tur esaki, Oseas a predesi ku e dia lo bini ora, ku despues di kastigá Su pueblo, Dios lo restourá nan fortuna, kita nan diosnan falsu, i forma un pakto ku nan. (Mira Os. 2:11-19.) Na e punto aki esnan ku tabata Lo-ammi, "no mi pueblo," lo bira Ammi, "mi pueblo."
Den e dianan di Pablo, e Ammi tabata "asta nos. . . no solamente e Hudiunan, pero tambe e Paganonan" (Rom. 9:24). Ki un presentashon kla i poderoso di e evangelio, un evangelio ku for di komienso tabata intenshoná pa e mundu kompletu. No ta nada straño ku nos komo Adventistanan ta tuma parti di nos yamada for di Revelashon 14:6: "I mi a mira un otro angel ta bula meimei di shelu, kende tabatin un evangelio eterno pa prediká na esnan ku ta biba riba tera, i na tur nashon i tribu i lenga i pueblo." Awe, meskos ku den dianan di Pablo, i meskos ku den dianan di Israel antiguo, e bon nobo di salbashon mester wòrdu plama dor di henter mundu.
Lesa Romanonan 9:25-29. Tuma nota di kuantu Pablo ta sita e Tèstamènt Bieu pa sigurá e kosnan ku tabata sosodé den su dia. Kiko ta e mensahe básiko ku ta wòrdu haña den e pasashi aki? Ki speransa ta wòrdu ofresé aki na su lesadónan?
E echo ku algun di Pablo su famia a rechasá e yamada di e evangelio ta dun'é "gran tristesa i un doló kontinuo den su kurason (Rom. 9:2). Pero a lo ménos tabatin un remanente. Dios Su promesanan no ta faya, inkluso ora ser humano ta hasié. E speransa ku nos por tin ta, na final, Dios Su promesanan lo kumpli, i si nos reklamá e promesanan ei pa nos mes, nan lo wòrdu kumpli den nos, tambe.
Kuantu biaha hende a faya ku bo? Kuantu biaha bo a faya ku bo mes i otronan?
Probablemente mas tantu ku bo por konta, un ta bèrdat? Ki Ièsnan bo por siña for di e
TROMPEKANDO
djaweps, 07-12-2017
"Kiko nos lo bisa anto? Ku paganonan, ku no a buska hustisia, a logra haña hustisia, esta, e hustisia ku ta pa medio di fe. Ma Israel, ku tabata buska un lei di hustisia, no a alkansá e lei ei. Pakiko? Pasobra nan no a busk'é pa medio di fe" (Rom. 9:30-32). Kiko ta e mensahe aki, i, mas importante, kon nos por tuma e mensahe aki ku tabata skirbi den un sierto tempu i lugá i apliká e prinsipionan na nos mes awe? Kon nos por evitá na hasi e mesun erornan den nos konteksto ku algun Israelitanan a hasi den di nan?
Den palabranan ku no por wòrdu komprondé malu, Pablo ta splika na su famia dikon nan ta fayando riba algu ku Dios ta deseá pa nan tin i mas ku esei, den algu ku den realidat nan tabata pèrsigui pero no a logra.
Interesantemente, e Paganonan kua Dios a aseptá ni sikiera tabata lucha pa tal aseptashon.
Nan tabata persigui nan propio interesnan i metanan ora ku e mensahe di evangelio a yega na nan. Garando su balor, nan a asept'é. Dios a deklará nan hustu pa motibu ku nan a aseptá Hesus Kristu komo nan Supstituto. Tabata un transakshon di fe.
E problema ku e Israelitanan tabata ku nan a trompeká na e piedra di trompeká (mira Rom.
9:33). Algun, no tur (mira Echonan 2:41), a rechasá na aseptá Hesus di Nazaret komo e Mesias kua Dios a manda. E no a kumpli ku nan ekspektashonnan di e Mesias; p'esei nan a bira nan lomba p'E ora ku El a bini.
Promé ku e kapitulo aki terminá, Pablo ta sita un otro versikulo di Tèstamènt bieu: "manera ta pará skirbi: "Mira, Mi ta pone na Sion un piedra di trompeká i un baranka di ofensa, i esun ku kere den djE lo no keda brongosá" (Rom. 9:33). Den e pasashi aki, Pablo ta mustra atrobe djis kon krusial fe berdadero ta den e plan di salbashon (mira tambe 1 Ped. 2:6-8). Un baranka di ofensa? I tòg, ken sea ku kere den djE lo no wòrdu desapuntá? Si, pa hopi, Hesus ta un piedra di trompeká, pero pa esnan ku konos'E i stim'E, e ta un otro sorto di piedra, "e baranka di mi salbashon." (Sal. 89:26).
Bo a yega di haña ku Hesus ta un "piedra di trompeká" òf un "baranka di ofensa"? Si ta asina, kon? Esei ta, kiko bo tabata hasi ku a hiba bo den e situashon ei? Kon bo a sali afó, i kiko bo a siña asina ku, sperando, ku nunka mas lo bo haña bo mes den e sorto di relashon kontrali ei ku Hesus atrobe?
PENSAMENTU MAS PROFUNDO:
djabierne, 08-12-2017
Lesa Ellen G. White, "Later English Reformers," pp. 261, 262, in The Great Controversy; "Faith and Works," pp. 530, 531, in The SDA Encyclopedia; Ellen G. White Comments, pp. 1099, 1100, den The SDA Bible Commentary, vol. 1.
"Tin un skohementu di individuonan i un pueblo, e uniko eskoho haña den e palabra di Dios, kaminda hende ta wòrdu skohe pa wòrdu salba. Hopi a mira na e fin, pensando ku berdaderamente nan tabata skohe pa tin goso selestial; pero esaki no ta e eskoho ku e Beibel ta revelá. Hende ta skohe pa elaborá nan propio salbashon ku temor i temblamentu. E ta skohi pa bisti e armadura, pa bringa e bon bataya di fe. E ta skohe pa usa e medionan ku Dios a pone na su alkanse pa bringa kontra kada pashon no santu, miéntras ku Satanas ta hunga e wega di bida pa su alma. E ta wòrdu skohe pa vigilá den orashon, pa investigá e Skrituranan, i pa evitá na kai den tentashon. E ta skohe pa tin fe kontinuamente. E ta skohe pa ta obediente na kada palabra ku ta sali for di boka di Dios, ku e por ta, no solamente un skuchadó, pero un hasidó di e palabra. Esaki ta eskoho di Beibel." Ellen G. White, Testimonies to Ministers and Gospel Workers, pp. 453, 454.
"Niun mente finito por komprondé totalmente e karakter òf e obranan di Esun Infinito. Nos no por dor di buska haña Dios. Pa mentenan mas fuerte i di gran kultura meskos tambe na esnan mas debil i mas ignorante, e Ser santu ei mester permanesé bisti den misterio. Pero ounke
`nubianan i skuridat profundo ta rondon'E: hustisia i huisio ta e fundeshi di Su trono.' Salmo 97:2.
Nos por komprondé te awor Su trato ku nos pa diserni miserikòrdia ilimitá uni na poder infinito.
Nos por komprondé mes tantu di Su propósito ku nos ta kapas na komprendé; mas aya di esaki nos mester konfia ainda e man ku ta omnipotente, e kurason ku ta yen di amor."—Ellen G. White, Education, p. 169.
PREGUNTANAN PA DISKUSHON:
1. Sierto Kristiannan ta siña ku, asta promé ku nos nase, Dios a skohe algun pa ta salba i algun pa ta pèrdi. Si abo por ta unu di esnan kua Dios, den Su amor i sabiduria infinito, a preordena pa ta pèrdi, e ora ei no importá e eskohonan ku bo hasi, bo ta destiná pa perdishon kua hopi hende ta kere ku ta nifiká kima den fiérnu pa eternidat. Den otro palabra, no dor di nos eskoho pero solamente dor di providensia di Dios, algun ta predestiná pa biba sin un relashon salbadó ku Hesus aki den e bida aki, solamente pa pasa e siguiente kimando pa semper den e kandelanan di fiérnu. Kiko ta robes ku e kuadro ei? Kon e bista ei ta kontrastá
